Wednesday, December 6, 2017

ප්‍රභාකරන් වගේ යකෙකුට මෛත්‍රී කරන්නේ කොහොමද?



හාමුදුරු වරු මෛත්‍රිය ගැන උගන්වන කොට කියනවා සකල ලෝක වාසීන්ම අරමුණු කරගෙන මෛත්‍රී කරන්න කියලා. එක් එක අය අරගෙන මෛත්‍රී කරන්න කියලා.

බුදු හාමුදුරුවෝ කරණීය මෙත්ත සූත්‍රයේදී කියනවා, එක දරුවෙක් ඇති මවක් ඇයගේ දරුවාට මෛත්‍රී කරනවා වගේ සකල ලෝක සත්ත්වයාටම මෛත්‍රී කරන්න කියලා.

ඒත් බොහෝ උපාසක උපාසිකා වන්ට මේ වැඩෙ කියන තරම් පහසු නෑ. ලෝකෙට මෛත්‍රී කරන්න ගියාම මතක් වෙන්නේ තරහ කාරයෝ. තමන්ට අපහාස කල උන්, තමන්ගේ දරුවන්ගේ දියුනුවට බාධා කල උන්, තමන්ගේ මතයට එරෙහිව ගැටෙන උන්, තමන්ගේ ජාතියට ආගමට වින කරන උන්, වගේ නොයෙකුත් (උන්ට මෛත්‍රී කරන්නේ කොහොමද කියන කුලකයට අයිති) චරිත.

යුද්ධය ප්‍රභලව පැවති සමයේ දිනක් (කොළඹ හා අනෙක් නගර ආස්‍රිතව බස් වල කෝච්චි වල බුරුතු පිටින් අහින්සකයින් මැරෙන කාලයේ,දින පතා පත්තර පිටු පුරා මියගිය පාසැල් සිසු දරුවන්ගේ දෙමාපියන්ගේ මල මිනී බදා හඬාවැටෙන පින්තූරු පලවන යුගයේ), රූපවාහිනියේ දහම් ගැටළු වැඩසටහනකදී එක් මවක් හාමුදුරුවන්ගෙන් කෙලින්ම විම්සා සිටියා "හාමුදුරුවනේ රටේ වෙන දේවල් වල හැටියට අපි කොහොමද ප්‍රභාකරන් වගේ ම්ලේච්චයෙකුට මෛත්‍රී කරන්නේ" කියලා.

එදා තත්වය අනුවනම් මේක හරිම උභතෝකෝටික ප්‍රෂ්නයක්.

මට මතක හැටියට එදා ඒ හාමුදුරුවනුත් ඒ ප්‍රෂ්නයට සාරථක පිළිතුරක් දී ගැනීමේ අසාර්ථක වුනා. ඒත් මනුස්සයෙක් කියල හිතලා මෛත්‍රී කරන්න් කියලා හාමුදුරුවන් ප්‍රශ්නයෙන් ලිස්සල ගියා.

ඇත්තටම අපිට ඒ වගේ දැඩිව අපේ පිළිකුලට වෛරයට පාත්‍ර වෙන ආකාරයේ පුද්ගල චරිතයකට මෛත්‍රී කල හැකිද?
එසේනම් ඒ කොහොමද?

මෙන්න මේ ප්‍රශ්නය ඉහත මම උපමා කරගත් පුදගල චරිතය ඉවත් කරලා සොයා බලන්න ඕනේ.

ඇතැමුන් කියන ලෙස උපේක්ශාවෙන් බැලීමෙන් (ආදරයෙන් හා ද්වේශයෙන් තොරව ) ද මේ වගේ කෙනෙකුට මෛත්‍රී කරන්නේ. ද්වේශයෙන් තොරව බැලිය හැකිනම් තවත් මෛත්‍රියක් මොකටද?
ඉතින් එතැනට එන්නේ කොහොමද?

මට නම් මේක කල නොහැකි දෙයක්. ඔය කියන විදියට ඕනෙම කෙනෙකුට මෛත්‍රී කරන්නේ කොහොමද.

මෙන්න මෙහෙමයි මම ඒ ප්‍රෂ්ණෙට පිළිතුරු සොයා ගත්තේ.

අපි මෛත්‍රී කරන්වා කියල කරන්නේ මොකක්ද.

මම නිදුක් වෙම්වා
මම නිරෝගී වෙම්වා
මම සුවපත් වෙම්වා
මම නිවන් දකිම්වා

කියලා ඇස් වහගෙන ජප කරලා ඉවර වෙලා

සියළු සත්ත්වයෝ නිදුක් වෙත්වා
සියළු සත්ත්වයෝ නිරෝගි වෙත්වා
සියළු සත්ත්වයෝ සුවපත් වෙත්වා
සියළු සත්ත්වයෝ නිවන් දකිත්වා

කියලාත් ජප කරනවා.

ඒත් ප්‍රායෝගිකව අපි දන්නවා
සියළු සත්ත්වයෝ නිදුක් වෙන්නේවත්, නිරෝගී වෙන්නේවත්, සුවපත් වෙන්නේ වත් ඒ වගේම නිවන් දකින්නේවත් නැතෙයි කියන කාරනය.

මෙක පහැදිලි කරගන්න අපි "සිරිපාල මුදලාලි" කියල චරිතයක් ගනිමු.
දැන් මේ සිරිපාල මුදලාලි අරමුණු කරල අපි කියනවා " සිර්‍රිපාල මුදලාලි නිදුක් වෙත්වා" කියලා. ඔන්න ඔතැනදී සිරිපාල මුදලාලි නිදුක් වෙන්නට නම්, ඔහු තුල දුක පවතින්නට ඕනෑ. දුකක් දොම්නසක් පසුතැවීමක් අසහනයක් නැති මිනිසෙක් ලෝකයේ නැති බව ඕනෑම කෙනෙකුට වැටහෙනවානේ. ඉතින් අපි ඔහු තුල ඇති දුක් මොනවාදැයි උපකල්පනය කල හැකියි එවිට අපිට අපි දන්නා සීමාව තුල ඔහුගේ යම් යම් දුබලතා දුක් පීඩා වැටහෙන්නට ගන්නවා.

ඔහු තුළ තිබිය හැකියි ඔහු දුකට පත්කරවන හෙතු කාරනා රැසක්. අපි ඒ එක් එක් කාරනය ඔහුට දුකට හේතු වී ඇත්තේ කෙසේද? ඔහු ඒ දුක නිසා කොතරම් පීඩාවක් ලබනවාද ආදී වශයෙන් යම් අනුමාන උපකල්පනයක් කල හැකි වෙනවා.
ඒ දුකින් මිදීමට ඔහුට කල හැකි දේ සහ ඊට ඇති ඉඩ ප්‍රස්ථා අපිට පෙනෙනවා. ඒත් ඒවා මග හැරී ඇති හේතුනුත් අපිට පෙනෙනවා.

ඊලඟට බලමු "සිරිපාල මුදලාලි නිරෝගි වෙත්වා" කියන කොට.
ඒත් එහෙම නේද, දැන් අපිට පෙනෙනවා ඔහු තුල ඇතී  හෝ තිබිය හැකි පීඩා කාරී තත්වයන් රෝගී භාවයන්. ඉතින් ඔහු ඒවාට ලක් වී ඇති හේතූන් , ඒවායින් මිදීම වලකන හේතූන්.

මේ විදියට අපිට මේ සමස්ත ජප කිරීමම හේතු පහදමින් දීර්ග භාවනාවක් කිරීමට හැකියි.

එතකොට මේ භාවනාවේ ප්‍රථිපලය ?

මෙහෙම දිගින් දිගට සීතීමෙන් අපි  අනෙක් අරමුණු ගත පුද්ගලයා තුල ඇති අඩු පාඩු දුබලතා හා පීඩා හොඳින් වටහා ගන්නවා. ඒ ඔස්සේ ඔහු, අප කෙරෙහි දක්වන විරෝධී හැසිරීම වල හේතූන් පැහැදිලි වෙනවා. දැන් අපි ඒ පුද්ගලයාගේ භාවයන් සමග ගනුදෙනු කරන්නේ නැහැ. අපි ගනුදෙනු කරන්නේ ඔහුගේ භාවයන් වලට ඇති හේතුන් සමගයි. ඔහුටම ජය ගත නොහැකි හේතූන් සමගයි.

අපි අමුතුවෙන් ඔහු දිහා මෛත්‍රීයෙන් හෝ උපෙක්ශාවෙන් බැලීමක් දැන් අවශ්‍ය නැහැ. ඒ අපි දැනටම ඔහුව ගැඹුරින් දැක් ඇති නිසා. දැන් ඔහු සමාජය ඉදිරියේ දක්වන භාවයන් එසේ නොවුනාම් පුදුමයි කියන තත්වය දක්වා අපි ඔහුව වටහා ගන්නවා.
ඉන් පසු අපිට ඔහු කෙරෙහි වෛරයක් ද්වේශයක් නම් ඇති වන්නේම නැහැ. අපි එක්කො ඔහුගෙන වන පීඩ වැලකීමට ඔහුව මග හරිනවා. නැතිනම් ඔහු සමග සුහදව හැසිරෙනවා. සුහද හැසිරීමකට දැන් නම් බාධා නැහැ (ඔහුගෙන් අපිට අන්තුරක් නැතිනම් ).

ඔන්න ඔහොමයි මම මෛත්‍රී කිරීම ප්‍රායෝගිකව දුටුවෙ.

මේක කියවන හැමට මෛත්‍රී සිත් පහල වේවා.!
ඔව් පරලොව ගිය ඒ අසරනයා ප්‍රභාකරන් කෙරෙහිත් !
ඒ අන්තවාදී දැක්මම දරමින් එය ඉදිරියට ගෙන යන්නට තැත් දරන අනෙක් සියළු අසරනයින් කෙරෙහිත් !

Friday, November 24, 2017

දුම්රිය අනතුරු.


දුම් රියක් ලොරි දෙකක හා මෝටර් රථයක ගැටුනු පුවතක් දින කිහිපයකට පෙර වත්තල ප්‍රදේශයේදී වාර්තා වුනා.

වාසනාවකට ජීවිත හානි සිදු නොවුනත් එතැනදී සිදුවූ අනතුර ඉතා භයානක අනතුරක් වගේම මගේ දැක්මේ හැටියට රියදුරන්ට වැරදි පැටවිය නොහැකි සිදු වීමක්.

මම එහෙම කියන්නේ ඔය තැනදීම මීට ටික කලකට පෙර ඔයහා සමාන ආසන්න අවස්ථාවකට මාද මුහුණ දී ඇති නිසයි.

මා මුහුණ දුන් අත්දැකීම

එදා මා රථය පදවමින් සිටියේ වත්තල දෙස සිට කිරිබත්ගොඩ දෙසට හුනුපිටිය මාර්ගයේ. ඉතා අධික රත වාහන තද බධයක් තිබුනු වෙලාවේ දුම් රිය හරස් මග විවෘත්තවයි තිබුනේ. මා ගමන් කල දෙසට ගමන් කරන වාහන රැසක් ඒ ඔස්සේ දුම් රිය හරස් මගට ඇතුළු වුනත් ඉදිරිය අවහිර වී තිබූ නිසා කිසිදු වාහනයකට එක එල්ලේ දුම් රිය හරස් න්මග පසු කොට යාමේ හැකියාවක් වුනේ නැහැ. ඉතා මන්ද ගාමීව සියල්ලන් ගමන් කරමින් සිටිනා අතර එක් වරම සීනු නාද කරමින් ගේට්ටු වැසී ගියා.
ඉතා පුළුල් දුම් රිය හරස් මගක් අඌ එහි මාත් මට පිටුපසින් තව වාහන කිහිපයකුත් දුම් රිය පීලි මද හරියේ නතර වී සිටියා මිස ඉදිරියට යාමට හැකියාවක් වූයේ නැහැ. මට ඉදිරියෙන් තිබූ විශාල වාහනයක් පවා තිබිනේ දුම් රිය පීලි මතයි.
දුම් රිය මග මත සිටි සියලු රියැදුරන් නලා හඬවමින් ඉදිරියේ උන් වාහන උනන්දු කරවූවද ඉතා හෙමින් වාහන සෙලවෙමින් තමයි තුබුනේ.
කෙසේ හෝ දුම් රියක් පැමිනීමට පෙර මාගේ වාහනය අවසන් පීලෙන්ද ඉදිරියට ඉතා ස්වල්ප ලෙස ගැනීමට හැකි වූ මුත් මට පිටුපසින් තවත් කාර් රතයක් හා කුඩා ජීප් රථයක් දුම් රිය පීලි මත රැඳී තිබුනා. ඔවුන් නොකඩවා නලා නාද කරත් ඉදිරියේ සිටි කිසිවෙකුට තවත් ඉදිරියට යාමේ ඉඩක් නම් වූයේ නැහැ.
ඒ අතරේ මාර්ගයේ මැදින් වෙන්වන ලෙස පොලිස් කෝන් (රතු පැහැති ) තබා වෙන්කොට තිබූ අතර මාර්ගයේ ප්‍රථිවිරුද්ධ දිශාවට හොඳින් ඉඩ තිබුනා.
වැඩි දුර නොහිතා මා කෙලින්ම පොලිස් කෝන් අතරින් මගේ රථය පාරේ වැරදි පැත්තට ඇතුලු කලා ඒ සැනින් පිටුපසින් වූ වාහන දෙකම ලැබුනු සුළු ඉඩ ප්‍රයෝජනයට් ගෙන දුම් රිය මගෙන් ඉවත් වුනා.

දැන් තමයි කථාව.
මම දැන් පාරේ වැරදි පැත්තේ මට හරි පැත්තට දාගන්න විදියක් නැහැ. මෙහෙම හිර වෙලා ඉන්න අතරේ ඔන්න හිටි ගමන් රැස් විහිදමින් බැබලෙමින් පොලිස් නිලධාරි තුමෙක් මගේ දිහාවට එනවා. දුර සිටම වීදුරුව පහත දාන්නට මට සන් කල ඔහු කෙලින්ම ආචාරස්ශීලී ලීලාවෙන් මගේ ඇඟට කඩා පැන්න. කෝන් තියල පාර බෙදල තියෙනව පේන්නේ නැද්ද කොහෙද මේ යන්නේ කියලා ආචාර ශීලීව විමසුවා. මම ඉතින් කල හැකි දෙයක් නැති නිසා මම කල දෙය කිව්වා.
එතකොට නිලදාරී උත්තමයා කියනවා ඒවා බලා ගන්න තමයි අපි ඉන්නේ එහෙම කියල පාරෙ වැරදි පැත්තෙ යන්න බෑ ලයිසන් එක දෙනව මෙහාට කියලා ආදරයෙන් කියා සිටියා.

හරි තමුසෙට පුළුවන් දෙයක් කරනව මමත් මේක අතහරින්නේ නැහැ කියල හිතාගෙන මම ලයිසන් එක උන්දැට දුන්න.
මම හිර වුනු තැනම හිරවෙලා ඉඳී (අනිත් වාහනත් හිර වෙලාම තමයි තවම ) රැස් විහිදෙන නිලධාරි තුමා වාහන අස්සෙන් ඉදිරියට ගියා. දැන් මගේ ලයිසන් එකට වුනු දේවත් මම දන්නේ නෑ. මට කොලයක් දුන්නෙත් නෑ මුකුත් නෑ.
එහෙමම වාහන හිරවෙලා තුබුනා විනාඩි දහයක් විතර ඔය අතරේ මගේ අවධානයට ලක් නොවී දුම් රියත් යන්න ඇති.
මෙන්න නිලධාරිතුමා අයෙත් මතු වුනා වාහන අස්සෙන්. මම බලා පොරොත්තු වුනා දන් මට දඩ කොලයක් දේවී කියලා. හැබැයි ඒ වෙනකොට තත්වය වෙනස් වෙලා. වාහනත් සෙමින් ගමන් කරන්නට පටන් ගෙන. මගේ ලඟට ආ උන්දෑ වචනයක් වත් නොකියා කවුලුව තුලින් ලයිසන් එක මට දීලා කෝන් එකක් අයින් කරල මට යන්න කිව්වා.

ඊයේ පෙරේදා සිදු වුනු දරුනු අනතුර වෙලාවේ රියදුරන්ටයි දුම් රිය රියදුරන්ටයි ඔක්කොටම වරද පැටවූ මහා බල පරාක්‍රමයෙන් හෙබි දුම් රිය ගේට්ටු කරුනම් එදිනත් මා දුටුවේ නම් නැහැ.

ඔන්න ඔහොමයි අපි පාරේ යන්නේ.

මේ කථාව ඔස්සේ ශ්‍රී ලංකාවේ මාර්ග වල පරිපාලන තත්වය ගැන අපිට හිතන්න ගොඩක් කරුනු තියෙනවා.
මේ තරමට මාර්ග අනතුරු සීමා වී තියෙන්නේත් රියදුරන්ගේ අවධානයෙන් යුතු ක්‍රියා කලාපය නිසා බවයි මම හිතන්නේ.

මේක තව බොහෝ දුරට කථා කල හැකි මාතෘකාවක් වෙනවා.

Tuesday, November 21, 2017

සමූහ දූශනයට ලක්වූ තරුණිය



සමූහ දූශනයකට ලක්වූ තරුණියක ගැන මගේ අවධානයට එන්නේ මේ දිනවල රූපවාහිනී නාලිකාවක ප්‍රචාරය වන ටෙලියක් නිසායි. අහම්බෙන් මේ ටෙලියේ කොටස් දෙක තුනක් නැරබීමට ලැබුනා.
එහි එක් චරිතයක් වන්නේ තම පෙම්වතා ඉදිරියේදීම සමූහ දූශනයකට ලක් වූ තරුණියක්. මැරයින්ගෙන් පහරකා අඩපනව සිටි පෙම්වතා ඒ අවස්ථාවේ තමා ගලවා නොගැනීම නිසා පෙම්වතාට වෛර කරන තරුණියක්.

නාට්‍යයක ඉදිරිපත් කිරීම කියන කෝනයෙන් බැලූකල මෙහි ඉදිරිපත් කිරීම් කරනා නළු නිලියන් සාමාන්‍ය ටෙලි නාට්ට්‍ය මටාමේදී ඉතා සාර්ථක රංගනයන් ඉදිරිපත් කිරීමට සමත් වෙනවා.

ඒනමුත් මා මෙහිදී අවදානයට ලක් කරන්නේ මෙවන් තේමාවක් නාට්‍යයකට යොදා ගැනීම මගින් නාට්‍ය කරුවා බලා පොරොත්තු වන්නේ කුමක්දැයි සොයා බැලීමටයි.

මේ චරිතය ගොඩනැගීම තුල ඔවුන් ඉතා ගැඹුරින් එම තරුණියගේ මානසික වියවුල් භාවය විදහා දැක්වීමට සමත් වෙනවා. ඒත් එතුලින් ඇති කල හැකි සමාජ බලපෑම ඔවුන් පූර්ණව නොසලකා හැර ඇති බවකුයි මා දකින්නේ.

සමාජ වගකීමක් ඇති නිර්මාන කරුවෙකු නම්, තමන් ප්‍රති නිර්මානය කරන චරිතය අයත් සැබෑ කුලකයක් සමාජය තුල වෙසෙන බව වටහා ගත යුතු වනවා වගේම මේ ඔස්සේ ඔවුන් වෙත ලබා දෙන පණිවුඩය කවරාකාරදැයි වටහා ගත යුතු වෙනවා.
එනමුත් මෙහිදී දැඩි මානසික ව්‍යාකූල තාවයකින් පෙලෙන මෙම තරුණිය නිසා සැබෑවේදී එවන් අත්දැකීමක් ලැබුවෙකු නැවත එම මුල් මානසිකත්වය කරා යොමු වී එහි පීඩාව එදා ලැබුවාටත් වඩා දැඩිව පුණරාවර්ජනය කර ගැනීමකට ලක් විය හැකියි. එලෙස අතීතයේ වලදැමූ මතකයක් පීඩාකාරී මතකයක් පුණරාවර්ජනය වීම තුල පුද්ගලයෙකුගේ අද දවසට ඇතිකල හැකි බලපෑම කවරාකාරදැයි අපට පහසුවෙන් උපකල්පනය කිරීමෙහි හැකියාවක් නැහැ. එවැන්නක් දිව යාහැකි දුර පිළිබඳ අනාවැකි පැවසිය හැක්කෙකු නැහැ.

මේ කථාවෙහි තරුණිය මුහුන දෙන ආකාරයේ බරපතල අපයෝජනයකට ලක්වන පුද්ගලයෙකු ඉන් පසු පත්වන මානසික වියවුල, ඒ ගැන ගැඹුරෙන් සිතා නැති හෝ තමා උපමා කොට සිතා නැතියෙකුට වටහා ගත නොහැකි මට්ටමේ පීඩාකාරි අතිදැකීමකි. එවන් තැනැත්තෙකු අනායාසයෙන්ම තම සිරුර පිළිකුල් කිරීමකට පෙළැඹෙනවා. ඒත් ඒ පිළිකුල ඉවත දැමිය නොහැක්කක්. අසූචි තැවරුනු ඇඳුමක් ගලවා දැමිය නොහැකි අවස්ථාවක්. මේ ඔවුන් පත්වන බරපතල මානසික වියවුලයි.

එහෙත් කෙතරම් බරපතල මානසික වියවුලක් වුවද කාලයෙන් හා උපදේශන මගින් ක්‍රමයෙන් වියැකී යනවා. ඒත් එවන් වියැකුනු මතකයන් මෙවැනි කථා මගින් ඉතා බරපතල ලෙස පීඩා විඳින චරිතයන් තුලින් පුනරූපනය කිරීමෙන් නැවත අවදි කරවනවා.

මේ නාට්‍ය කරුවා විනාශකර දමන්නේ මානසික උපදේශනයන් වල මාස ගනනක් වෙහෙසක් විය හැකියි. කෙනෙකුගේ මුලුමහත් ජීවිතයක් හෝ අනාගතයක් විය හැකියි.
කලා කරුවාට නිර්මාන කිරීමේ නිදහස අවශ්‍යයි. එය අපි අවිවාදයෙන් පිළිගත යුතුයි එහෙත් කලා කරුවා තමාගේ සීමාව හඳුනා නොගැනීම තුලින් අනෙකුන්ගේ ජීවිත අවධානමෙහි හෙලනවානම්......?



Monday, October 9, 2017

පාසැල් වියේ ප්‍රේමය.

සමාජයට විෂවූ පාසැල් වියේ ප්‍රේමය.

Image result for school uniform couple
පින්තූරය අන්තර්ජාලයෙන් ලබාගත්තකි

මුහුණු පොතේ සාකච්චාවන් කරන පාසැල් වියේ සිට යොවුන් විය දක්වා පරාසයක දරුවන් සිටින මව් පියවරුන් වූ මගේ මිතුරු මිතුරියන් පිරිසක් හා සාකච්චාවේදී මතු වූ කරුනු ඔස්සේ මේ ලිපිය සැකසුනු නිසා එය බ්ලොගයේ පල කල යුතුයැයි මට සිතුනා. 
පාසැල් වියේ ප්‍රේමය ගැන කථා කරන කොට අපි ඉතාම ප්‍රවේශමෙන් මෙහි ඇති මූලික කරුනු වටහා ගත යුතු වෙනවා.
පාසැල් වියේ ප්‍රේමයට නතු වන්නේ කවුරුන්ද?
වයස 10 සිට 19 දක්වා පශ්චාත් ළමා වියේ හා නව යොවුන් වියේ පුද්ගලයින්.
මේ වයස් සීමාව සැලකීමේදී පුද්ගල වර්ධනයේ ඉතා වැදගත් අවධියක් වන මේ කාල සීමාව තුල දරුවෙකු කායික මෙන්ම මානසික විපර්යාසයන් රැසකටම මුහුණ දෙනවා. මේ මාතෘකාව සාකච්චා කරන අපි, මෙන්න මේ කායික හා මානසික කරුනු ගැන බොහෝම සංවේදීව දරුවෙකුගේ දැක්මෙන් දැකිය යුතු වෙනවා.
මේ අවධියේ දරුවෙකු මුහුණ දෙන ප්‍රධානම ගැටලුව තමයි තමන්ගේ සිරුරේ වෙන වෙනස් කම්. අපේ වැනි සංවෘත්ත සමාජ ක්‍රමයක් තුල දරුවෙකු මේවා විසඳා ගැනීමට නොහැකි දේවල් එමෙන්ම දරාගත යුතු රහසිගත් අත්දැකීම් ලෙස පීඩා විඳිනවා. ඒවගේම විරුද්ධ ලිංගිකයන්ගේ වෙනස්වීම් ගැන කුතුහලයට පත් වෙනවා.
දරුවන් අභ්‍යන්තරයෙන් පෙලෙන මෙවන් කාරන අහම්බෙන් හෝ දැන ගත් විට වැඩිහිටිය පෙළඹෙන්නේ
මුන්ට මගුල් විසේ ඉහට ගහලා
ඇටෙන් පොත්තෙන් එන්න කලින් මගුල් විසේ
වැනි දරදඬු ප්‍රහාර එල්ල කිරීමටයි.
ඒ වගේම සලකා බැලිය යුතු කරුනක් තමයි මෙහි නීතිමය පාර්ශවය.
ලංකාවේ වලංගු නීතිය අනුව වයස දහ අට ඉක්මවූ ගැහැණු හෝ පිරිමි දරුවෙකු පුරවැසියෙකු වශයෙන් පිළිගනු ලබනවා.
රථවාහන පැදවීමේ බලපත්‍ර ලබා ගැනීමට
ඡන්ද ප්‍රකාශ කිරීමට
හා තම අභිමතය පරිදි විවාහයක් සිදු කර ගැනීමට
මොවුන් නෛතිකව අවසර ලාබීන්.
එහෙත් අපේ අධ්‍යාපන ක්‍රමය තුල පාසැල් අධ්‍යාපනය ලැබීම වයස දහ නවය දක්වා සිදු වෙනවා. මෙන්න මෙතැන පැහැදිලි ගැටළුවක් නිර්මානය කරනවා.
වයස දහ අට ඉක්මවූ පාසැල් පෙම්වතුන් යුවලක් සිටියොත් පොලීසිය ඔවුන් කුදලාගෙන ගොස් සියලු සමාජ අවමන් කොට මව් පියන්ට පවා අවමන් වන ආකාරයෙන් විශාල ගෝශාවක් නිර්මාණය කරනවා. සමාජය මෙය දකින්නේ නැහැදුනු කමක් ලෙසටයි. ඒත් ශාරීරිකව මෙන්ම නෛතිකවද මේ යුවල වැඩිහිටියන් බව සැමට අමතක වෙනවා පාසැල් නිල ඇඳුම නිසා.
සිදු වීමෙන් පසු අදාල තරුණිය සමාජය ඉදිරියේ වැදගත් පිරිමියෙකුට අත ගත නොහැකි අවමන් සහගත ගැහැණියකි. "අපෝ ඕකි කොල්ලෙක් එක්ක පාර්ක් එකේ ඉඳලා පොලිසියෙනුත් අල්ලන් ගියා" කිමම සෑහෙන චරිත සහතිකයකි.
මේ දරුවන්ගේ අභ්‍යන්තරය දැකීමට වැඩිහිටියන් බහුතරයකට නොහැකිය, නැතිනම් දැකීමට නොහැකි තරම් කුහකය.
මෙවැනි තත්ව වලින් මුදවා ආත්ම ශක්තියක් සහිත තරුණ පරපුරක් රටට උරුම කර දීමට නම් පළමුවෙන්ම කල යුත්තේ ජාත්‍යන්තරයෙහි සිදු වනවා මෙන් පාසැල් අධ්‍යාපනය වයස 17 හී අවසන් වන ලෙසට අධ්‍යාපන ක්‍රමය ප්‍රථිසංස්කරනය කිරීමයි.
එසේම තම යෞවන විය අමතක වූ වැඩි හිටියන්හට එය මතක් කරදීමේ වැඩ මුළු පැවැත්වීමයි.
යම් කිසි සංවිධානයකට මැදිහත් වී වුවද මෙය සා පෙල දරුවන්ගේ දෙමාපියන් ඉලක්ක කර සිදු කල හැකිය.
මේ කථාව හරහා දරුවන්ට වල් බූරු නිදහසක් ලබා දී අයාලේ යාමට ඉඩ දීමක් මම අදහස් කරන්නේ නෑ. සීමා පැනවීම් හා ඉලක්කයන් කරා මෙහෙයවීම් ඉතා සූක්ශමව අවබෝධයෙන්ම කල යුතුයි.
ඒවගේම ගෙදරින් දෙමාපියන්ගෙන් හොඳ ආදරයක් ලබන දරුවන් පිටස්තර ආදරයක් සොයා යාමට පෙළඹීම් ඉතා අඩුබව ප්‍රකට කරුනක්. එහි ඇත්තක් තියෙනවා. ඒත් නිසි වයසේදීත් සහකරුවෙකු/සහකාරියක සොයා ගැනීමට නොපෙළැඹී දෙමාපියන් මත රැඳීමට උත්සහ කිරීමේ අවධානමකුත් එහි තියෙනවා.
මෙවා ඉතා බුද්ධිමතව හා සූක්ෂමව විසඳිය යුතු තත්වයන් ලෙසයි මම දකින්නේ.
සාකච්චාවට විවෘත්තයි

Monday, August 28, 2017

බෞද්ධ සමාජයක ගබ්සාව ...?

ගබ්සාව...!
ආයෙත් සමාජ කතිකාවතක් බවට පත්වෙලා.

ඔක්කොටම කලින් කියන්න ඕනේ මේ මාතෘකාව ගැන අපූරුම බ්ලොග් සටහන් තියල තියෙන්නේ ඒ ගැන කථා කරන්න සුදුසුම පුද්ගලයෙකු වන පෞද්ගලික වෘත්තීය අත්දැකීම් ලැබා ඇති අනිත් කොන බ්ලොගය ලියන වෛද්‍ය තුමිය.

කැමැති නම් වෛද්‍ය තුමියකගේ අත්දැකීම් සහිත අනිත්කොන ලිපිය මෙතැනින් කියවන්න  -

මොකුත්ම කරන්න බෑ අම්මේ !


මම මේ ප්‍රශ්නය දකින්නේ වෙනත් කෝනයකින්. මේකට විරුද්ධ වෙන බොහෝ පිරිසක් සමාජය තුල මතුවී ඇති අතර ඔවුන් දන් දැන් සමාජ මතවාදයක් ගොඩ නැගීම උදෙසා බුදු දහම පාවිච්චියට ගන්නා තත්වයක් දකින්නට ලැබීම තමයි මගේ අවධානයට ලක් වන්නේ.

ගබ්සාව බුදු දහමට පට හැනියි 
මෙන්න මේක තමයි සරලම හේතුව.
එයට පැහැදිලි කිරීම් දක්වන උදවියගේ තර්ක ගැන මොහොතක් අවධානය යොමු කර බලමු.

ගබ්සාව ප්‍රාණ ඝාතයක්.
ඔව් මේක ධර්මය අනුව ඉතාම පැහැදිලි තත්වයක්. බුදු දහමේ මිනිසෙකුගේ වයස ගනනය කරන්නේ පිළිසිඳ ගැනීමේ සිටයි. භික්ෂුවක් උපසම්පදාව සඳහා සුදුසු වන්නේ සම්මත වයස 19යි මාස 9න් පසුයි එය 20 නොවෙයි.
එසේනම් කුමන තත්වයක හෝ කලලයක් විනාශ කිරීම එහි වැඩීම බාධා කිරීම ප්‍රනඝාත අකුසලයක් තමයි.

මේ ගැන විමසීමේදී මා සැලකිලිමත් වන කාරනය නම් අප කිසිවෙකුට හෝ සමස්ථ සමාජය ප්‍රාණ ඝාත අකුසලයෙන් වැලකීමේ වග්කීමක් පැවරී ඇතිද යන්නයි.
බුදු හිමියන් දෙස බැලුවහොත් උන් වහන්සේ සමස්ත මිනිස් ප්‍රජාව පවින් ගලවා ගන්නා ගැලවුම් කාරයෙකු ලෙස කිසිදින හඳුන්වා ගත්තේ නැහැ. එසේම බෞද්ධයැයි කියා ගන්න ප්‍රජාවක් හෝ පවින් මුක්ත කිරීමට උන්වහන්සේ ඉදිරිපත් වූයේ නැහැ. එසේ සමස්ත මිනිස් වර්ගයා හෝ බෞද්ධයැයි කියා ගන්නා ප්‍රජාවක් පවින් ගැලවීමේ වගකීමක් කිසිවෙකු වෙත පවරා ලූයේත් නැහැ.

ගිහි කල 999ක් මිනිස් ඝාතන කල අංගුලිමාලයන් හට ඒ පාපය නිර්වාන මාර්ඝයට පවා භාධක වූයේ නැහැ.

බුදු හිමියන් ගබ්සාවකට සහය පල කල භික්ෂුනියක්ට එය පාරාජිකා ඇවැතක් ලෙස දක්වා ලූ හෙයින් අප සමාජය මෙයට විරුද්ධ විය යුතු බව තවත් තර්කයක් ඉදිරිපත්ව තිබෙනවා මා දුටුවා.

එසේනම් ඒ කොතැනකදී කෙසේදයි සොයා බැලීම සැමට වැදගත් විය හැකියි.

බුදු හිමියන් භික්ෂූන් උදෙසා සතර පාරාජිකා ධර්මයකුත් භික්ෂුනීන් උදෙසා අශ්ඨ පාරාජිකා දර්මයකුත් පනවා තිබෙනවා.( පාරාජිකා යනු යම් කිසි මහණෙකු එම ඇවැත සිදු කලහොත් එය භික්ෂූත්වය කෙලෙසීමකි. අදාල පුද්ගලයා භික්ෂූත්වයෙන් පිරිහෙන අතර ඒ භවයේ නැවත භික්ෂූත්වයක් ලැබීමේ භාග්‍යය අහිමි වෙයි )
මේ පාරාජිකා දර්මයන් අතර මිනිස් ඝාතනය එක් පාරාජිකා ඇවැතක් ලෙසයි දැක්වෙන්නේ.

විනය පිටකයට අනුව එක් භික්ෂුණියක් තම දායිකාවකට යම් කිසි හේතුවක් නිසා ඇය ගැබ නසා ලීමට උපදෙස් දෙනවා. එසේ ගැබක් නසා ලූ බව දැන බුදු හිමියන් එසේ උපදෙස් දීම ඝාතනයකට ඍජු සම්බන්ධයක් ලෙස දක්වා එවැනි ක්‍රියාවක් පාරාජිකා ඇවැතක් වන මිනිස් ඝාතනය යටතේම දක්වනු ලබනවා.
මෙතැනදී මේ ගබ්සාව අති බරපතල ඇවැතක් ලෙස බුදු හිමියන් දක්වාලූයේ පැවිදි සමාජය අරඹයා බව අප සිහි තබා ගත යුතුය.

දැන් මේ උපාසක චණ්ඩාල ගෝත්‍රය විසින් කියන්නේ බුදු හිමියන් ගබ්සාව පාරාජිකාවක් ලෙස භික්ෂුනීන්ට දෙසා වදාල නිසා ගිහි සමාජය ඉන් වැලකිය යුතු බවකි.

එසේනම් අප අනෙකුත් පාරාජිකා ඇවැත් ගැන මදක් විමසා බලමු. භික්ෂු භික්ෂුනී පාරාජිකා වල පළමු පාරාජිකා ඇවැත දක්වා ඇත්තේ මෛතුන්‍ය පාරාජිකාවයි. එනම් භික්ෂු භික්ෂුනී දෙපිරිසම පැවිද්දට පත් මොහොතේ සිට අතිශය ලෞකික පැවැත්මක් වූ මෛතුන්‍ය ආශ්වාදයෙන් පූර්ණ ලෙසම වැලකිය යුතුය. යමෙකු එම මෛතුන්‍ය ආශ්වාද වින්දේ නම් ඔහු හෝ ඇය පාරාජිකා තත්වයට පත්වේ.

දැන් එතකොට බුදු හිමියන් පාරාජිකා ලෙස පැනැවූ නිසා බෞද්ධ සමාජය මෛතූන්‍යයෙන් වලකිනවාද? මෛතූන්‍යය අපරාධයක් ලෙස සලකනවාද?
එසේ වූවානම් වඩා හොඳය. එසේනම් ගබ්සාවට හේතු නැතිවී බෞද්ධ සමාජයෙන් ගබ්සාව තුරන් වනු ඇත. අපූරු විසඳුමකි.

භික්ෂු භික්ෂුනී සමාජය උදෙසා සුළු පරිමාන වූ හෝ සොරකමද පාරාජිකාවකි.

මග ඵල ලාභියෙකු නොවී එලෙස පෙනී සිටීමද පාරාජිකාවකි.

මේ ගබ්සාවට එරෙහිව හඬ නගන්නන් ජීවිතයට කිසිදු ප්‍රාණ ඝාතයක් නොකල වුන්ද? අඩු ගනනේ මෙතැන් සිට මැසි මදුරු ආදී අල්ප සත්ත්වයෙකු හෝ ඝාතනයෙන් වැලකීමට ප්‍රතිඥා දුන්නවුන්ද? මා නිර්භයව කියමි මම චේතනාන්විතව කිසිදු සත්ත්වයෙකු ඝාතනය නොකරන්නෙක්.

ගබ්සාව පිළිබඳව රජය එළඹ ඇති තීරණය අනුව විකලාංග ජාන විකෘති උපත්, හා දූශනය වීමෙන් ගැබ් ගත් වවස්ථා වලදී ගබ්සාවට ඉඩදී ඇතැයි මම සිතමි. ඒ ගැන නීතිමය තත්වය මා සොයා බලා නැත. එය එසේනම්, මේ තීරනය ගනු ලබන්නේ අදාල මව විසිනි. එය ඇයගේ අනාගත පැවැත්ම උදෙසා ඇය විසින්ම ගනු ලබන තීරණයක් වන අතර ප්‍රාණඝාත අකුසලයක බර දැනුවත්ව ගනුයේ ඇය විසින්මය. ඉතින් සමාජයක් ඒ අසරණියකට එරෙහිව හඬ නැගීම කොතරම් වූ අවැඩක්දැයි මේ සුචරිත වාදීන්ට නොපෙනෙන්නේ ඇයි. ඇය ප්‍රානගාතයක් කරමින් ගනනය කල අවධානමක් ගනියි නම්, එය අප කාගේවත් ගිනුමකට බැරවන පවක් අකුසලයක් නොවෙයි නම් ඇයි මේ සමාජ ප්‍රථිරෝධයක්.

ඇයගෙ ගැබ ගැන මෙන්ම ඇයගේ සසර ජීවිතය ගැනද අවධානම ගන්නේ ඇය විසින්මය. එය දැනුවත්වමය.

ඉතින් අප බෞද්ධ සමාජයක් ලෙස අගතිගාමීව අනුන් මත පින් පැටවීමෙන් වැලකී අපගේ සසර විමුක්තිය සොයා වෙහෙසෙමු.

ඊනියා සුචරිත වාදීන් අතින් කෙලෙසී පියවරුන් රහිත දරුවන් මෙලොවට බිහි කරන එතැන් පටන් සුචරිත වාදී සමාජයට බඩුවක් වන ඇයට ඉන් ගැලවීමට යම් අවධානමක් ගැනීමට රිසි නම් ඒ අවස්ථාව ඇය සතු විය යුතුය. එවන් ප්‍රාන ඝාතයකට හේතුවූ දැරිය කෙලෙසූ මිනිසා මේ ප්‍රණඝාත අකුසලයෙන් විනිර්මුක්තයැයි මා පිළිනොගනිමි

මගේ මතයට අභියෝග කරන ඕනෑම කෙනෙකුට ඊට ඉඩ ඇත

Saturday, July 15, 2017

දැයේ වාසනාවට "ස්වයංජාත හැල් වී" පහල වෙලා.......

මේ දිනවල සුප්‍රකට මාතෘකාවක් "ස්වයංජාත හැල් වී"

Image may contain: plant, tree, outdoor and natureImage may contain: plant, tree, outdoor and nature

උපාසිකාවන් විසින් බොහෝ ගර්වයෙන් "සිටුවා" ඇති ස්වයංජාත වී.

ඡායාරූප උපුටා ගත්තේ සාරභූමි ගොවි සමූහයෙනි


මට මිතුරෙකුගෙන් දැන ගැනීමට ලැබුනේ එක්තරා ප්‍රකට භික්ෂුවක් (දැනට අපවත්වී ඇති ) තමන්ගේ බල මහිමය නිසා ස්වයංජාත හැල් වී පහල වූ බවත් මේ ඒවායැයි කියා යම්කිසි බීජ හතරක් තම දායකයින් වෙත බෙදා දුන් වගත්,
එම බීජ හතර රෝපණය කොට ගත් එම දායකයින් එයින් ලද බීජ ධාතු බෙදනවාක් මෙන් මහත් වූ ගෞරවයකින් බොහෝදෙනා අතරේ බෙදා ඇති බවකුත්ය.

මෙසේ දෙවැනි වටයේ බීජ ලද පින්වතුන් ඒවායෙන් තවත් බීජ බොහෝ දෙනා අතරේ බෙදා ඇති අතර, අදටත් තවත් පින්වන්ත උපාසක උපාසිකාවන් රැසක් මේ බීජ සොයමින් සැරි සරයි.

ඒ අතරේ සාර්ථකව පැල සාදාගත් උපාසක උපාසිකාවන්, ස්වයංජාත හැල් වී වලින් සහල් ගෙන බත් උයා එයින් බුදු හිමියන් වෙත බුද්ධ පූජා පවත්වා මහත් වූ පින් රැස් කරගෙන ඇත.

මේ ස්වයංජාත හැල් වී පහල වූයේ කෙසේද?

යම් කිසි අයෙකුගේ බල මහිමයෙන් එය පහල වූවානම්, එය අහේතුක ප්‍රාදූර්භූත වීමකි.
සියල්ල හේතුඵල දහමක් මත පැහැදිළි කරන බුදු හිමියන්ගේ දහමට මේ අහෙතුක ප්‍රාදූර්භූත වීම කොතෙක් දුරට ගැලපෙනවාදැයි සොයා බැලීම ඔබගේ කර්තව්‍යයකි.

එසේම මේ ස්වයංජාත හැල් වී එසේ හදිසියේ පහල වූවක් නම්,
එය මෙදක්වා විද්‍යාත්මක ශාක වර්ගීකරණයක ලැයිස්තු ගත වී නැති ශාකයක් විය යුතුමය.
එසේනම් මේ කියන ශාකය එවැන්නක් ද?

නැත, මේ අපේ පින්වත් උපාසක උපාසිකාවන් ස්වයංජාත හැල් වී යැයි වගාකරමින් සිටින්නෙ කුමක්ද

ඒ 1977 ට පෙර යුගයේ හාල් වලට සීමා පැනවී තිබුනු කාලයේ, මිනිසුන් අඩු ජල සැපයුමකින් වගා කල හැකි නිසා වගා කල දැනට ලෝකයේ බොහෝ දුරට සත්ත්ව ආහාර සඳහාම (පත්‍ර හා බීජ යන දෙකොටසම සත්ත්ව ආහාර සඳහා යොදා ගනී) වගා කරන "සෝගම්" නම් වූ තෘණ කුලයේ ධාන්‍ය භෝගයයි. සිංහලෙන් මෙය "ඉදල් ඉරිඟු" යන නාමයෙන් හඳුන්වයි

ඉතාම රළු ධාන්‍ය විශේශයක් වන මෙය මිනිස් පරිභෝජනයට ආකර්ශනීය වන්නක් නොවේ.

ස්වයංජාත හැල් වී බුදු දහමට ගැලපෙන්නේ කොතැනින්ද යන්නත් විමසා බැලිය යුතු කරුනකි.

මෙය සඳහන් වන්නේ බුදු හිමියන් දෙසා වදාල කරුනු ඇතුලත් සූත්‍ර දේශනාවක් වන,
සූත්‍ර පිටකයේ
දීඝ නිකායේ
පාථික වග්ගයෙහි
සිවුවැනි සූත්‍ර දේශනාව වූ
"අග්ගඤ්ඤ සූත්‍රයෙ"හිය.

ස්වයංජාත හැල් වී ගැන කථා කිරීමේදී මෙම සූත්‍ර දේශනාව ගැන විමසා බැලීම අනිවාර්‍ය අවශ්‍යතාවයකි.

අදාල සූත්‍ර දේශනාවේදී බුදු හිමියන්, නවක භික්ශූන් වූ බ්‍රහ්මන කුල තරුණයෙකු හා සංවාදයක යෙදෙයි.
එහෙදී බුදු හිමියන් විමසන්නේ තමන් උසස් යැයි ගර්වයකින් වෙසෙන බ්‍රාහ්මනයින් එම කුලය හැරදා සසුන් ගත වූ අය හට අවමන් නොකරතිදැයි කියායි.

එහෙදී බ්‍රාහ්මනයින්ගේ උසස් බව ට හේතු ලෙස දක්වන මහ බබුගේ මුඛයෙන් උපත ලද වුන් බව කියන කථාව එම තරුණයින් විසින් බුදු හිමියන් වෙත පවසා ලයි.

එයට පිළිතුරු සපයන බුදු හිමියන්, එය පහත අයුරින් අවඥාවට ලක් කරනු ලබති.

උපුටා ගැනීම - ත්‍රිපිටකය සිංහල පරිවර්ථනය (2500 බුද්ධ ජයන්තිය)

වාශිෂ්ඨයෙන්, බ්‍රාහ්මණයින්ගේ ඔසප් වූද, ගැබිනි වූද, වදන්නා වූද, කිරි පොවන්නා වූද බැමිණියෝ දක්නා ලැබෙත්.
ඒ බමුණෝ යෝනියෙන් උපන්නෝ වන්නාහු.
බ්‍රහ්මන වර්ණය (කුලය ) ශ්‍රේෂ්ටය, බ්‍රහ්මයාගේ දායාද වූ බ්‍රහ්මයාගේ ඖරස පුත්‍ර යැයි මෙසේ කියත්. එසේ කියන්නාහු බ්‍රහ්මයාටම නින්දා කරත්.

උපුටා ගැනීම අවසන්.

මෙසේ බ්‍රහ්මනයින් හෙලා දකින බුදු හිමියන්,
වාශිෂ්ඨයෙනි, මේ බ්‍රාහ්මනයෝ ඒකාන්තයෙන්ම පුරාණ කථාව (ලෝකෝත්පත්ති චර්‍යාවංශය ) සිහි නොකන්නාහු.
යයි පවසති.

ඉන් අනතුරුව තවත් පැහැදිලිකිරීම් වලින් පසු බුදු හිමියන්, මේ ලෝකෝත්පත්ති චර්‍යාවංශය නම් වූ පුරාන කථාව දේශනා කරයි.
මේ පුරාණ කථාව බුදු හිමියන්ගේ මුවින් කියැවුනය්හ් එය බුදු හිමියන්ගේ මතයක් නොවන බව අදාල සූත්‍රය මැනැවින් කියැවීමේදී පැහැදිලි වෙයි.
බුදු හිමියන්ගේ වදනින්ම මේ පුරාණ කථාවකි.
එසේ නම් එවක පැවති දැනුමකි.

මේ පුරාණ කථාව තුලදී එහි එක් තැනෙක
පොළොවෙන් ඉබේ පැන නැගි ඇට සහිත හැල් සහලක් වෙයි, එම සහලෙහි, කුඩු නැත, පොතු නැත, කපා ගත් තැන හිස් වෙන්නේ නැත. උදා බතට කපා ගත් තැන දිවා බතට යලි පැන නැගෙයි.
(ඉබේ හටගන්නා - ස්වයංජාත වෙයි )

මේ සහල මනසින් දූශිත වන මිනිසුන් විසින් එක් රැස් කිරීමට ගනියි. දිවා අහර පිණිස උදේ එක් වර රැගෙන යයි. මේ නිසා කුඩු ඇති විය, පොතු ඇති විය, කැපූතැන නැවත පැන නොනැගුනේය, පන්දුරු පන්දුරු ලෙස පැවතියේය.
මේ ලෙස ස්වයං ජාත බව පිරිහුනේය. හෙවත් අතුරුදන් වූයේය.

මෙසේ පිරිහීම නිසා දුක ජනිතවීම පාදක කොටගත් කථාව අවසන බුදු හිමියන්, කෙලෙස් නසා සත්‍යාවබෝධයෙහි අර්තයම පැහැදිලි කරමින් මේ පුරාණ කථාව නිමවා ලයි.

එසේනම් මේ පුරාන කතාව බුදු හිමියන්ගේ දේශනාවක් හෝ නොවන්නේමය. එය උන් වහන්සේ විසින් උපුටා දක්වන දැනුමක් පමණකි.

එවන් විටෙක, දැන් මේ පහල වී ඇති ස්වයංජාත හැල් සහල් සොයා යන්නන් යමින් සිටින්නේ කොතැනකටද?
ඔවුන් ගේ ස්වයංජාත සහල් ඉබේ පැනැ නැගෙන්නේ නැත.
කපා ගත් කල නැවත පිරෙන්නේ නැත.
කුඩුද පොතුද සහිතය.

අහෝ නැවත ජනිත වූ ස්වයංජාතයෙහි තතු.

සියල්ල හේතු ඵල දහමක් තුලින් පැහැදිලි කල බුදු හිමියන් හේතු රහිතව පැනැනැගි ස්වයංජාත හැල් වර්ගයක් ගැන දෙසූ බව මුන් පිළිගනිති.
ඒ සහල භික්ෂුවකගේ බලමහිමයෙන් නැවත උපන් බව සිතති.

එසේ පහල වූ සහල විද්‍යාත්මක වර්ගීකරනයකට මෙතෙක් හසූ වී නැති නවතම ශාක විශේශයක්දැයි නොසොයති.

ගසක් වවා බීජ ගෙන නැවත වවා බීජ ගන්නා ගසකට ස්වයංජාත යැයි කියති.

මෙවන් වූ මුග්දයන් රැලක් තමන් බුදුන් සරණ ගිය උපාසකයින් ලෙසද හඳුන්වා ගනිති.

එසේ බීජ බෙදා දුන්නායැයි කියැවෙන භික්ශුව ගැන මා කිසිත් නොකියමි.
හේතු දෙකක් නිසා.
1. ඒ චීවරයක් දරා සිටින භික්ෂුවක නිසා
2. එම භික්ෂුව දැනට අපවත්වී ඇති නිසා.

මේ ලිපිය වාදයට නොව. සිහි නුවනැත්තන්ට කියවා තවත් තොරතුරු සොයා වටහා ගන්නටය.

අග්ගඤ්ඤ සූත්‍රය පිළිබඳ මගේ දැනුම අවධි කල මා කලණ මිතුරු කථා 32 බ්ලොගයේ කතා කතු තුමාට පින් පතමි.

Wednesday, July 5, 2017

වාහනයට පෙට්‍රල් ගැසුවෙමි.

Image result for fuel station

පින්තූරෙ අන්තර් ජාලයෙන් බාගත් එකක්

ලද අත්දැකීමක් වාහන පාවිච්චි කරන කාටත් වැදගත් නිසා මෙතැන ලියන්නට සිතුනා.

එහෙම හිතලා ලියන්න ආවාම කාලෙකින් බ්ලොග් පැත්තෙ නාව නිසා ලියන එක බ්ලොග් එකට ඇතුලු කරන්න කොහොමද මතක් කරගන්නත් ටික වෙලාවක් ගියා.

කථාව මෙහෙමයි.

මම නුගේගොඩ ඉඳන් නාවල පාරේ රාජගිරිය පැත්තට එන ගමන් වාහනයට පෙට්‍රල් ටිකක් ගහගන්න ඕනා වුනා.
එනකොට පාරේ හොඳට පේන්න තියෙන නාවල විවෘත්ත විශ්ව විද්‍යාලය අසල ඉන්ධන පිරවුම් හල දැකලා එතැනට ගියා වැඩේ කරගන්න.

මම ඉන්ධන පොම්පෙ ලඟ වාහනය නවත්තලා පැති වීදුරුව ඇරලා සේවකයාට කිව්වා දෙදාහක ගහන්න කියලා
මිනිහත් කිසි කථාවක් නැතිව පොම්පේ දෙදාහ සටහන් කරලා වාහනේ ඉන්ධන මූඩිය ඇරලා පොම්පෙදාලා පෙට්‍රල් ගැහැව්වා.

ස්වයංක්‍රීය ලීවරය දාලා වීදුරුවෙන් අත දාලා මුදලුත් ගත්තා. මම බිලක් ඉල්ලුව නිසා මිනිහ ටක් ගාලා ගිහින් බිලක් අරන් ඇවිත් හිට ගත්තේ කෙලින්ම මට පොම්පේ වැහෙන ආකාරයට.
එහෙම ඉඳන් මට බිල දික් කරලා මගෙන ඇහුවා මහත්තයා සල්ලි දුන්නද කියලා. (ඒ වචනේ ඇහැව්වෙම මගේ අවධානය ඉවතට ගන්න කියලා මට තේරුනේ පස්සෙයි )

එතකොටම කීක් කීක් කීක් කියල හඬවල් කීපයක් මට සේවකයාට පිටු පසින් ඇහුනා.

මට හොඳින් මතක තිබුනා සේවකයා ඇවිත් හිට ගන්න කොට මීටරයේ කියැවීම තිබුනේ එක් දහස් දෙසීයක පමණ මට්ටමේ.

සේවකයා ජනේලයෙන් ඉවත් වන විට මීටරයේ දෙදාහ වැටිලා පොම්පය නැවතිලා.

වරදක් සිදු වුනු බව මට එක විටම වැටහුනා.

මම සේවකයාගෙන ඇහුවා ඒ මොකක්ද වුනේ දෙදාහක් තෙල් වැදුනේ නැහැ කොහොමද පොම්පෙ නැවතුනේ කියලා.

එතකොට කලබල වුනු ඔහු එක වරම පොම්පයේ බොත්තමක් එබුවා එතකොට මීටරයේ නැවතුනු තැන කියැවීම එක් දහස් හාරසිය හතලිස් පහක් පෙන්නුම් කලා.

එවිට ඔහු වහාම පොම්පෙ නැවතිලා සර්, මම තව පන්සිය පණහක් ගහන්නම් කියලා ආයෙත් අලුතින් පන්සිය පණහක් ගැහැව්වා.

පස්සේ බලන කොට උපක්‍රමය තමයි
අදාල සේවකයා පොම්පේ වහලා සිට ගත්තාම, පිටුපසින් වෙනත් අයෙක් වහාම එහි බොත්තම් ඔබා පොම්පය නවතා එහි දෙදාහක් අගය සටහන් කිරීම.

ඉතින් එය නොදන මම ඉවත්ව ගියා නම් ඔවුන් රුපියල් පන්සිය පණහක අමතර ලාබයක් ලබනවා.

මෙය දැන සිටීම කාටත් වැදගත් නිසා මෙසේ සටහන් කර තිබ්බේ.

ඒත් ඉතින් මම ඒ වන්චාවට එරෙහිව එම සේවකයන් ගැන පාලකයින්ට පැමිණිලි කලේ නම් නැහැ.
එය කල යුතුද නැද්ද යන්න මට ගැටළුවක් වුනු නිසා කරබාගෙන එතැනින් පිටව ආවා.