Monday, April 8, 2019

අත දිගහැර වියදම් කරන සල්ලිකාර ශ්‍රී ලාංකික මැද පන්තිය

ලංකාවේ මධ්‍යම පන්තිකයන් නැති වාදම ගසාගෙන සැමදා ජීවත් වන සැලකිය යුතු මට්ටමේ සල්ලි කාරයන් පිරිසකි.

 එහෙම කියන්න අටුවා ටීකා අර්ථ දැක්වීම් මහා සමාජ විග්‍රහ ආදී අටෝරාශියක් කථාන්දර ඕනා කරන්නේ නැත.
පාරට බැස බැලුවාම "ඕනෑ ගොනෙකුට" එය තේරුම ගත හැකිය.





අපේ පාරවල් පිරිලා තියෙන්නේ තනිකර ජපන් කාර් වලින්ය. ඒ අතරට සැලකිය යුතු ගනනක් දැන් දැන් ඉන්දියානු වාහනද ඊට නොදෙවෙනිව යුරෝපියානු වාහනද එකතු වී ඇත.

මේ තරම් වාහන පාරේ දුවන්නට එක්කො ලංකාවේ වාහන සෑහෙන්න ලාභ විය යුතුය. නැත්නම් ලංකාවේ මධ්‍යම පන්තිය සෑහෙන පමණ සල්ලි කාරයින් විය යුතුය.

ලංකාවේ වාහන මිල ගැන දන්නා කවුරුත් ලංකාවේ වාහන ලාභ බවක් නම් කියන්නේ නැත.

අපේ තරුණ පරම්පරාව ඔවුන්ගේ වෲත්තිය ලෙස ත්‍රී වීල් රථ යොදා ගැනීම ගැන බොහෝ විවේචනද පසු ගිය දින වල එල්ල වූ නමුත් ඔවුන් ඒවා ගන්නේ ලාභ නිසාද? යන ප්‍රෂ්නය පැන නැගේ.

මේ ත්‍රී වීල් රථ නිපදවන ඉන්දියාවේ ඒවායේ මිලඉන්දියානු රුපියල් 135,000 සිට 160,000 අතර වේ
අද ඉන්දියානු රුපියලක ශ්‍රී ලංකා වටිනා කම ශ්‍රී ලංකා රුපියල් 2.53 කි
එසේනම් බජාජ් ත්‍රී වීලරයක මිල දල වශයෙන් ශ්‍රී ලංකා රුපියල් 341,000 සිට 404,000 කි.
ශ්‍රී ලංකාවේ වසරකට ලක්ෂ ගනන්ක් මේ රථ මිලදී ගන්නේ 850,000 ක් පමණ වූ මිලකටය.
දන් මා කියන්නට යන්නේ මෙය වඩා අඩු මුදලකට දිය යුතු බවක් නොවෙයි, අපේ තරුණයන් අතුරින් තම වෘත්තිය උදෙසා රුපියල් 850,000 මොන යම් ක්‍රමයකට හෝ ආයෝජනය කල හැකි පිරිස වසරකට ලක්ෂ ගනනක් බවය.

ඔවුන් මේ ආයෝජන හැකියාවේන් සත්‍ය වශයෙන්ම රුපියල් ලක්ෂ 4 ක් වටිනා වාහනයක් මිලදී ගෙන එසේ ස්වයං රැකියා අයෝජනයක් කරනවා වෙනුවෙන් තවත් ලක්ෂ 4.5 ක් පමණ රජයට බදු මුදලක් ගෙවා දමයි.

දැන් අපි මේ මිල තවත් පැති සමග සසඳා බලමු.
ඉන්දියානු කුඩා කාර් රථ මිල මෙසේය

රථය                                       ඉන්දියානු මිල ඉන්දි. රු.    ඉන්දියානු මිල ලංකා රු.    ලංකාවේ මිල ලංකා රු.
Bajaj Discover 125 Bike                             57,000                   144,000                               303,000
බජාජ් ත්‍රී වීලරය                                           160,000                   404,000                               850,000
රෙනෝල්ට් ක්විඩ්                                        271,000                   685,000                            2,200,000
මරූටි ඇල්ටො                                             253,000                  640,000                            2,100,000
සුසුකි සෙලරියෝ                                         431,000               1,090,000                            3,170,000

නිශ්පාදිත රටෙහි අදාල වාහනය වෙළඳ පොලේ විකිනෙන මිල හා ලංකාවේ ඒවා විකිනෙන මිල අතර පරතරය ලංකාවේ දැනට ජන්ප්‍රිය අළුත් වාහන වන වැගන් R, ස්ටින්ග් රේ, ටොයෝටා ඇක්සියො, ටොයෝටා ප්‍රෙමියෝ ආදී වැඩි මිල වාහන දක්වාම මෙයා කාරය.
එයින් ඉදිරියට ගියහොත් ටොයෝටා ප්‍රාඩෝ, බී එම් ඩබ්ලිව්, බෙන්ස් ආදී මිල අධික වාහන දක්වාම මේ පරතරය මේ ආකාරය.

ඒ අනුව අපිට මෙසේ ගනනය කල හැකිය,

ලංකාවේදී

  • බජාජ් ත්‍රී වීලරයක් මිලදී ගන්නේ ඇල්ටෝ, ක්විඩ් වැනි රථයකට වඩා වැඩි මිලකටය.
  • ඇල්ටෝවක් මිලදී ගන්නේ සෙලරියෝවකට වඩා වැඩි මිලකටය.
  • සෙලරියෝවක් මිලදී ගන්නේ ජපන් වැගන් R එකකට වඩා වැඩි මිලකටය.
  • ජපන් වැගන් R එකක් මිලදී ගන්නේ ඇක්සියෝ එකකට වඩා වැඩි මිලකටය. 
  • ඇක්සියෝ එකක් මිලදී ගන්නේ කුඩා යුරෝපියන් BMW එකක් ගන්නා මිලටත් වඩා වැඩි මිලකටය.
  • බෙන්ස් රථයක් මිලදී ගන්නේ රෝල්ස් රොයිස් රථයකටත් වඩා වැඩි මිලකටය.(ඇතැම් විට කුඩා ගුවන් යානයක් මිලදී ගත හැකි මිලකටය)

ලාංකිකයා මේ සියළු වාහන මිලදී ගන්නේ බැංකු ණය හෝ ලීසින්ග් පහසුකම් භාවිතා කරමින්ය, අද වන විට මෝටර් රථ වෙනුවෙන් ලීසිංග් පහසුකම් 50% කට සීමා කර ඇත.
එසේනම් අප මුලින් වාහනයක් මිලදී ගැනීමකදී මුදලින් ආයෝජනය කරනුයේ වාහනයේ සැබෑ මිල හා බදු මුදලින් 30% කි.
බදු මුදලෙහි ඉතිරිය ගෙවීම සඳහා අප වසර 5 ක ණය මුදලක් ලබා ගනී.
ඉන් පසු වාහනය භාවිතා කරමින් මාසිකව ඒ බදු මුදලෙහි හිඟයත්, ණයමුදලෙහි පොලියත්  වාර්ශිකව ඒ රථයට අදාල අනෙක් බදුත් ගෙවමු.

ලංකාවේ සැබෑ ප්‍රශ්නය වූ පොදු ප්‍රවාහන සේවා ප්‍රමිතිය ගැන සැලකිලිමත් වීමට කිසිවෙකු උනන්දු නොවන පරිසරයක, ජනතාව සිය සම්පූර්ණ මිලදී ගැනීමේ හැකියාව මේ ආකාරයට මෝටර් රථයක් මිලදී ගැනීමට හා එයට බදු ගෙවීමට වැය අරනු ලබයි.
එහි භයානකම හා ඍණාත්මකම බල පෑම සිදු වනුයේ මෙතැනිනි.
මේ හේතුව නිසා යම් ආර්ථික ශක්තියක් ඇති මධ්‍යම පාන්තිකයා අසීමිත ණය බරක හා පොලී සහ බදු බරක සිරවේ. ඔවුන් සතු නිර්මාණාත්මක හැකියාව හා ව්‍යාපාරික අයෝජන ඤානය පල රහිත වේ. කිසිවෙකුටත් තම රැකියාවෙන් උපයන මුදලින් ආයෝජනයක් කිරීමට හැකියාවක් නැත. එය ණය, පොලී හා බදු උගුලක මුලුමනින්ම සිරවී ගොස් ඇති බැවිනි.

රුපියල් ලක්ෂ 8 කට ත්‍රී වීලරයක් ගන්නා තරුණයාට රුපියල් ලක්ෂ 7 කට දෙනවානම් ඇල්ටෝවක් නොගන්නේ යැයි කියන්නේ කවුද?
එපමණක්ද? ඔහුගේ මුළු ආයෝජන ශ්ක්තිය හිරවී නැති නිසා ඔහු ඇතැම් විට තවක් යම්කිසි ආයෝජනයක එය යොදවා බැලීමට ඉඩක් එමගින් සෑදේ. සෑම පුද්ගලයෙකුම එසේ අයෝජන නොකලත්, ව්‍යවසායක මනසින් යුත් පුද්ගලයින් කී දෙනෙකු මේ වත්මන් තත්වය නිසා ආයෝජන "නො"හැකියාවෙන් මුලු ගැන්වී ඇතිදැයි අපට කිව හැකිද?

අපි ජාතියක් ලෙස මේ මොටර් රථ ආයෝජනයේ හා එහි ණය පොලී හා බදු උගුලෙහි සිරවී සිටිමු.
අවම ආදායම්  උපයන රටක් වන අපි මාස 35 - 40 ක සම්පූර්ණ ආදායම තරම් මුදලක් මෝටර් රථකට ආයෝජනය කරන්නෝ වෙමු. වාහන නිපදවන රටවල ආදායම් තත්වය සලකා බැලීමේදී මෝටර් රථයක් මිල පුද්ගලයෙකුගේ මාස 4 - 5 ක ආදායම තරම් වූ මුදලකි.
එහෙත්  අපිට ඉහල ආදායම් ඉපදවිය නොහැක, ඒ අපිට අයෝජන ශ්ක්තියක් නැති නිසාවෙනි.

අපි සම්පූර්ණයෙන් වරද්දාගත් ජාතියකි. 

නැත අපිට වරද්දවා ඇත.
අපේ ජීවන තත්වය පාලකයන් විසින් බලහත්කාරයෙන් පහතට හෙලා පාගා තබාගෙන සිටිති.
උන් අපේ බදු මුදලින් සුර සැප විඳිමින් අපිව පහලට හෙලා තබාගෙන සිටිති.
හිස එසවීමට ඉඩක් නොතබති.
අපි කවදා මේ ඇත්ත වටහා ගනිමුද?




Wednesday, December 12, 2018

බුද්ධාගම කියන්නේ කිසිම කමකට නැති ආගමක්,


බුද්ධාගම කියන්නේ කිසිම කමකට නැති ආගමක්,
Image may contain: 1 person, sky, closeup and outdoor

බුදු හාමුදුරුවන්ගෙන් මොනව හරි ඉල්ලුවම ලැබෙන්නෙත් නෑලු. ඒ වුනාට දෙයියෝ ගොඩක් ඉන්නවා. ඒ දෙවියන්ට භාර වෙනවා. හරි ගියා කියලා ඔප්පු කරන්වා, ඒ වුනාට දෙවියෝ නිසාද හරිගියේ කියලා හිතා ගන්නත් බෑ.
බුදු හාමුදුරුවෝ ඔය ඔක්කොම දෙයියන්ට වඩා උසස් ලු. ඒත් දෙවිකෙනෙක් නෙවෙයිලු. ඉල්ලුවට කිසි දෙයක් දෙන්නෙත් නෑලු.
ඉතින් මොකටද එහෙම කෙනෙකුට වඳින්නේ? මේ බොරු ආගමක් අදහලා මට ඇති වැඩක් තියෙනවද?
ඔය මීට අවුරුදු 17කට 18කට උඩදී මම හිතපු හැටි.
මම උත්තරයක් හොයා ගත්තා, අඩු ගානේ සමාජ සම්බන්ධතා හරි දියුනු නිසා මම කතෝලික වෙනවා.
කතෝලික ආගම දන්නා යාළුවන්ගෙන් විස්තර ටිකක් හොයා ගත්තා. ඒ වෙනකොටත් බයිබලේ කරුනු ටික ටික දැනගෙන හිටියා. තව දුරටත් යොහෝවා කාරයින්ගේ පොතුයි, බයිබල් කරුනු ගැන ලියවුනු විවිධ ලිපි වගේ දේවල් හොයාගෙන කියවන්න ගත්තා. හැබැයි පියතුමෙක් මුන ගැහෙන්න නම් ගියේ නැහැ. මට එහෙම හිතුනේ නැහැ. ඊට කලින් මේක මොකක්ද කියලා හොයලා බලන්න තමයි ඕනේ කලේ.
කොහොම වුනත් බුද්ධාගම අත හැරලා කතෝලිකයෙක් වෙන්න බොහෝම ආසන්නෙට මම එතකොට ගිහින්.
ඔන්න ඔය කාලේ තමයි හිටි ගමන් කොහෙන් ආවද නොදන්න අළුත් හාමුදුරු කෙනෙක් ටී වී එකේ ධර්ම සාකච්චා පවත්වන්න පටන් ගත්තේ. මම ඒ වෙන කොට ධර්ම සාකච්චා කිය්න්නේ මොකද කියලවත් දැනගෙන හිටියේ නැහැ.
බුද්ධාගම වගේ බොරු ආගමක් ගැන මොනවද මෙයා මේ ලොකු කථා කියන්නේ කියලා බලන්න මම ඒ සාකච්චා බලන්න පටන් ගත්තා. ටිකෙන් ටික මට තෙරුනා බුද්ධාගමට නෙවෙයි මටයි වැරදිලා තියෙන්නේ කියලා. මටත් නොදැනිම මම් උදේ හවා ඒ හාමුදුරුවෝ කියපු කාරනා හිතන්න පටන් ගත්තා. තව තව බුදු දහම ගැන ලියවුනු පොත් හොයාගෙන කියවන්න පටන් ගත්තා . මෙතෙක් කල නොතේරුනු බොහෝ දේ තේරුම් යන්න පටන් ගත්තා. බයිබල් කියවිල්ල වගේ දේවල් මටත් නොදැනීම මග හැරිලා ගියා.
බුදු හාමුදුරුවෝ කියන්නේ කවුද කියන එක ටික ටික තේරුම්යන්න පටන් ගත්තා.
ඔන්න ඔය විදියට මම බුද්ධාගම අත හැරලා කතෝලික ආගම වැලඳ ගන්න ගිය ගමන බෞද්ධයෙකු වෙලා නැවතුනා.
ඔව් උන් වහන්සේගේ මග පෙන්වීම නිසා මම උපතින් ලැබූ බුද්ධාගම අත හැරියා. මම කට ඇරලා කියන්න පුළුවන් මට්ටමේ තෙරුවන් සරණ ගිය බෞද්ධයෙකු බවට පත් වුනා.
ඒ කියවීමේ පුරුද්ද තව තව වැඩුනා. බලාපොරොත්තු නොවුනු වෙලාවක සම්පූර්ණ ත්‍රිපිටකයේ බුද්ධ ජයන්ති පරිවර්ථනය පාලි සිංහල දෙකම සොෆ්ට් කොපියක් ලැබුනා. ඒ තමයි මට ජීවිතේටම කෙනෙකුගෙන් ලැබුනු වටිනාම දේ.
අවාසනා වන්ත විදියට අපිට උන් වහන්සේගේ ඇසුර අහිමි වුනා. ඒත් ඒ වෙනකොට උන් වහන්සේ අපිව ගොඩක් දුර ගෙනිහින් ඉවරයි. කොටින්ම පාර පෙන්වලා දීලා ඉවරයි. උන් වහන්සේගේ සහය නැතුවම ගමන යන්න තරමට පාර පෙන්වා දීලා ඉවරයි.
උන් වහන්සේ පැතූ බෝධියකින් නිවන් සුව ලබත්වා කියලා මම අදත් ප්‍රර්ථනා කරනවා.
අද දෙසැම්බර් මාසේ 12වැනිදා.
ගෞරවනීය ගංගොඩවිල සෝම හිමියන් අපිට අහිමි වුනු දවස.
සෝම හිමි අනුස්මරණ දිනය.....

Sunday, October 28, 2018

නසෘදීන් සහ ශ්‍රී ලංකාවේ දේශපාලනය!!!

නසෘදීන් සහ ශ්‍රී ලංකාවේ දේශපාලනය!!!

ලාමක මිනිස් හැසිරීම් පෙන්වන දේශපාලන පිටිය??


ශ්‍රී ලංකා ඉතිහාසයේ පලමු වරට ජනාධිපති විසින් බලයෙන් පහ කරන ලද අගමැති වරයා, ව්‍යවස්ථා තරක ඉදිරිපත් කරමින් ධූරයේ රැඳී සිටින බව ප්‍රකාශ කරයි. මෙය නෛතික කෝනයෙන් සොයා බැලීමට අපට අයිතියක් නැත ඒ අප නීති විශාරදයින් නොවනා බැවිනි.

එහෙත් යුක්තියේ සාධාරණයේ ඇසින් එය විග්‍රහ කිරීමට බාධාවක්ද නැත.

මේ සිදුවීම දකිද්දී මට මෑතක එක්තරා ෆේස් බුක් ගෲපයක් කියැවූ නසෘදීන් ගේ කථාවක් සිහියට නැගුනි.

නසෘදීන් දිනක් තම මිතුරෙකු සොයා ගොස් තමාට ලොකු මුට්ටියක්  ටික දිනකට ලබා දිය හැකිදැයි විමසුවේලු.
මිතුරා ඔහුගේ ඉල්ලීම ඉටු කල බැවින් මිතුරාට ස්තුති කල නසෘදීන් මුට්ටියද රැගෙන ගියේය.

දින කිහිපයකින් මිතුරා හමුවට ගිය නසෘදීන්, මිතුරාගේ මුට්ටිය ඔහුට පෙරලා භාරදී තවත් කුඩා මුට්ටියක්ද ඔහුට දුන්නේලු. මේ මොකදැයි මිතුරා විමසූ විට නසෘදීන් ගේ පිළිතුර වූයේ " මා ලඟ තිබුයදී මේ මුට්ටිය පැටවෙකු දැම්මා. මුට්ටිය ඔබේ නිසා පැටවාත් සමගම ආපසු භාර දෙනවා" යන්නයි.මිතුරාට් ස්තුති කල නසෘදීන් යන්නට ගියේය.

ටික දිනකින් ආයේ පැමිණි නසෘදීන් මිතුරාගෙන් ලොකු මුට්ටිය දින කිහිපයකට ඉල්ලා ගෙන ගියේය.
මෙවර මිතුරා බොහෝ දිනක් බලා සිටියත් නසෘදීන් මුට්ටිය රැගෙන යලි ආවේ නැත.
අවසානයේ මිතුරා නසෘදීන් සොයා ගියේය.

මිතුරා දුටු නසෘදීන් කනගාටු දායක ලෙසින් ඔහු වෙත පැමින, මට ඔබට කියන්නට කනගාටු දායක පුවතක් තියෙනවා, මා ලඟ තිබියදී ඔබගේ මුට්ටිය මිය ගියා. ඒ ගැන කෙසේ ඔබට කියන්නදැයි මා සිතමින් සිටියේ කියා කීවේය.

උරණ වූ මිතුරා" ඔබ වංචා කරනවා, මුට්ටියක් මිය යන්නේ කෙසේද" යි විමසා සිටියේය.

පිළිතුරු ලෙස නසෘදීන් " එදා මුට්ටිය පැටවෙකු දැමුවායැ‍යි කී විට ඔබ ඒ ගැන විමතියට පත් වූයේ නැහැ නේද? ඔබ පැටවාවත් භාර ගත්තා නේද? එසේනම් දැන් මැරුණා යැයි කීවිට මා වංචා කරුවෙකියි පවසන්නේ ඇයිදැයි" විමසුවේය.

තමන්ට වාසි වන විට නීතිය යුක්තිය අමතක කිරීමත්
තමාට අවාසි සහගත විට නීතිය යුක්තිය කථා කිරීමත් මිනිස් ස්වභාවය වේ.

ලංකාවේ දේශපාලන භූමිය තුල අද අපි දකින්නේ මෙයම නේද?

Thursday, August 23, 2018

තිස් පහට (35) අඩු උන්ට ත්‍රී වීල් පැදවීම තහනම් කල යුතුය.

තිස් පහට (35) අඩු උන්ට ත්‍රී වීල් පැදවීම තහනම් කල යුතුය.
bajaj සඳහා පින්තුර ප්‍රතිඵල


මේ ඊයේ පෙරේදා ජනාධිපති තුමන් විසින් කටුගා දැමූ තවත් වැදගත් වැඩපිළිවෙලකි.
එහෙමවුනත් ඒ කටුගා දැමිල්ලට දොස් කියන්නටද බැරිය.
ඒ කොතනත් නිදා ගන්නා නිදි ඇමති විසින් කවුරුන් හෝ මැටි මෝලෙකු විසින් ලියා දුන් මරි මෝඩ පනතක් ආකාරයෙන් එය කැබිනට් මණ්ඩලයට ඉදිරිපත් කොට ඇති නිසාවෙනි.
දැන ගන්නට ඇති පරිදි මේ පනත මගින් වයස 35ට අඩු උන්ට මගී ප්‍රවාහණයේ යෙදීම තහනම් කොට ඇත. අරමුණ හොඳය වැඩ පිළිවෙල මීහරකෙකුවත් නොකර තරමේ ගොන් කමකි.

එක් වරම මෙය ක්‍රියාත්මක වුවානම්, දැනට ත්‍රීරෝද රථ, ඇල්ටෝ, නැනෝ ආදී ටැක්සි, පෞද්ගලික බස් රත පදවන රියැදුරන් දහස් ගනනක් එක් විටම තම රැකියාවට නුසුදුස්සන් වීම වැලැක්විය නොහැකිය. එසේ වූවානම් අර ඇමතියෙක් කියූ පරිදි එය තමන් කැමති වෘත්තියක නියැලීමේ අයිතියට වැට බැඳීමකි. (තමන් කැමති වෘත්තියක නියැලීම යනු ව්යැවස්ථාවෙන් ස්තාපිත අයිතියක්දැයි මම නම් නොදනිමි ).

ඒ කොහොම වෙතත්, මෙය වැදගත් වැඩකි.
කල යුතුම වැඩකි.

කල යුතුව තිබුනේ
දැනට මගී ප්‍රවාහනයේ යෙදී සිටිනා සියල්ලන්ම මාස තුනක් වැනි කෙටි කලක් තුල වහාම මගී ප්‍රවාහන රියදුරෙකු ලෙස රජයේ ලියා පදිංචියක් ලබා දීමයි.
එසේම මේ වැඩ පිළිවෙල ආරම්බයේදීම දැනට රියැදුරු බලපත් ලබා නැති අයට මගී ප්‍රවාහන බලපත්‍ර නිකුත් කිරීම නැවැත්වීමයි.
එසේ වූවානම් දැනට මේ ක්ශේත්‍රයේ නියැලි සියල්ලෝ තම වෘත්තිය තුල ස්ථාවර වනු ඇත. මගී ප්‍රවාහන රියදුරෙකු යනු වෘත්තීය සුදුසුකම් ලත් වෘත්තිකයෙකු ලෙස හඳුනා ගැනෙනු ඇත.
මූලික ලියා පදිංචියෙන් පසු මගී ප්‍රවාහන ක්ශේත්‍රයට පිවිසෙන ඕනෑම නවකයෙකු හට කොන්දේසි මාලාවක් ඉදිරිපත් කිරීම කිසි සේත්ම ගැටළු කාරී නොවේ.
එහිදී
වයස  35 සපුරා තිබීම
අපරාධ ඝනයේ වැරදි වලට උසාවියෙන් දඬුවම් ලබා නොතිබීම.
සංවිධානාත්මක අපරාධ වලට හවුල් කරුවෙකුව නොසිටීම

වැනි අත්‍යාවශ්‍ය කොන්දේසි රැසක් යොදා නියම සුදුස්සන් පමණක් එම වෘත්තීය බලපත්‍රයට සුදුස්සන් කිරීම කල හැකිය.

එවැනි සංවිධිත වැඩ පිළිවෙලක් වූවානම්, කිසිදු ගැටළුවකින් තොරව වත්මන් මගී ප්‍රවාහණ රියදුරන් පවා මේ වැඩ පිළිවෙලට අනුග්‍රහ දක්වනවා ඇත. ඒ යම් කිසි කාලයක් උදෙසා තම වෘත්තියේ තරඟ කාරීත්වය පාලනය වන බැවිනි
(දොස්තරලාත් තරඟ කාරීත්වයට බයනම් ත්‍රී රෝද රියැදුරන් ගැන කවර කථාද )

එලෙසින්ම මේ වැඩ පිළිවෙල ආරම්ඹ වී පළමු වසර තුලදීම ලක්ෂ දෙකකට වැඩි තරුණ පිරිසක් රටේ අනිකුත් රැකියා අවස්ථා කෙරෙහි යොමුවීම සිදු වනු ඇත. එමගින් දැනට රටේ ඇති සේවක අර්බුධයටද ඉක්මන් විසඳුම් ලැබීම ඇරඹෙනු ඇති.

එවන් වටිනා වැඩ පිළිවෙලක් නිවැරදි කර ක්‍රියාත්මක කිරීම වෙනුවට සිදු වූයේ කටුගා දැමීමකි.
මේ ලංකාවයි.

Wednesday, July 11, 2018

සීනි බද්ද සහ ඇස්පාර්ටේම්

සීනි බද්ද සහ ඇස්පාර්ටේම්
Image result for coke zeroImage result for pepsi zero


මෑත කාලයේ සීනි අධි භාවිතයෙන් බෝ නොවන රෝග වැඩියැයි රජය විසින් සීනි භාවිතය අඩු කිරීමේ අරමුණින් යැයි සියළු පැණි බීම මත බද්දක් පැනවූ බව බොහෝ දෙනා දන්නා කරුනකි.
එයට අමතරව නොබෝ දිනකින් තවත් ඒ සමාන බද්දක් පැනැවීමට කටයුතු කරනා බවත් එම බද්ද යටතේ ටොෆී, චොකලට්, බිස්කට්, කේක් ආදී සියළු සීනි අඩංගු ආහාර අඩංගු වන බවත් පැවසේ. එහෙත් මේ ප්‍රවෘත්තිය හුදෙක් දැනට ආරංචි මාත්‍රයක් පමණක් බැවින් එහි සත්‍යාසත්‍ය භාවය නොදන්නා නිසා දැනට ඒ ගැන කථා නොකරමු.

මෙතැනදී ප්‍රධාන වශයෙන්ම සලකා බැලිය යුත්තේ සීනි භාවිතය දුර්මුඛ කිරීමේ සැබෑ අවසන් ප්‍රථිපලය කුමක්ද යනුයි.

දැනට අප දන්නා පරිදි සීනි භාවිතයේ වියදම් අධික නිසා සිසිල් බීම නිශ්පාදකයන් එයට විකල්ප පැණිරස කාරකය ලෙස ඇස්පාර්ටේම් නම් රසායනිකය භාවිතා කරන බව මේ පිළිබඳව දැනුමැත්තෝ දනිති.

මේ ඇස්පාර්ටේම් හා එහි ගුනාත්මක භාවය ගැන සලකා බැලීම දැන් කාලීන අවශ්‍යතාවයක් බවට ලංකාවේත් පත් වෙමින් තිබේ.
මෙතෙක් කල් ලංකාවේ ඇස්පාර්ටේම් නම් රසකාරකය භාවිතා වූයේ දියවැඩියා හෝ වෙනයම් සීනි අගුන රෝගීන් සඳහා වූ පැනිරස කාරකයක් ලෙසිනි. එය ෆාර්මසි වලින් පමණක් මිලදී ගත හැකි වූ රසකාරකයකි.එසේම එය සීනි වලට වඩා මිල වැඩි ආදේශකයක් නිසාද සාමාන්‍ය ජනයා කිසි දිනෙක මේ රසකාරකයට නිරාවරණය වූයේ නැත.

එහෙත් මෑතක පැනවූ සීනි බද්ද නිසා දැන් දැන් පොදු වෙළඳ පොලේ සීනි රහිත හෙවත් සීරෝ (ZERO) නමින් බොහෝ පැණි බීම වර්ග හඳුන්වා දෙමින් තිබේ.
මේවායේ ඇත්ත වශයෙන්ම සීනි බිඳකුදු අඩංගු නොවන අතර පැණි රසයෙහි කිසිදු අඩුවක් නැත. එවායේ ලේබලයේම සඳහන්ව ඇත්තේ "ඇස්පාර්ටේම්" රසකාරකය අඩංගු වන බවකි.
මේ හේතුවෙන් ශ්‍රී ලාංකික පාරිභෝගිකයා ඔවුන්ගේ කැමැත්තෙන් පරි භාහිරව මූල්‍යමය හේතුවක් නිසා ඇස්පාර්ටේම් භාවිතයට යොමු කරවා ඇතැයි කීවොත් එය වඩා නිවැරදි වේ.

ඉදිරියේදී ආරංචි ආකාර සීනි බද්දක් යම් හෙයකින් චොකොලට්, අයිස්ක්‍රීම්, බිස්කට්, කේක් ඇතුළු බේකරි නිශ්පාදන මත පැනවුවහොත්, මේ තත්වය වඩා පුළුල් වේ. ලාබ සීනි යොදාගෙන බදු ගෙවනවාට වඩා ඇස්පාර්ටේම් යොදා ගැනීම එවිට නිශ්පාදකයාට ලාභදායක වෙනු ඇත.
ඒ ඔස්සේ ජනතාව වැඩි වැඩියෙන් ඇස්පාර්ටේම් අනුභව කිරීමට පෙළඹෙනු ඇත.

ඒ නිසා ඇස්පාර්ටේම් පිළිබඳ යම් සොයා බැලීමක් කිරීමේ වැදගත් කම මතුවේ.
ඇස්පාර්ටේම් රසකාරකයෙහි මූලිකවම අඩංගු වනුයේ
ඇස්පාර්ටික් ඇසිඩ් නම් ඇමයිනෝ අම්ලය හා ෆීනයිලැලනයින් ඩයිපෙප්ටයිඩ් යන රසායනික ද්විත්වයයි.
ෆීනයිලැලනයින් ඩයිපෙප්ටයිඩ් රසායනිකය හැසීරීම අතින් දැනටම බොහෝ දෙනාගේ සැකයට භාජනය වී ඇති ග්ලූටමේට් කාණ්ඩයේ රසායනික වලට සමාන බව දැක්වේ. එම නිසා එහි ඇති සෞඛ්‍ය හිතකර භාවයද ප්‍රශ්නාර්ථයකි.
මේ රසායනිකය පැණි රසකාරකයක් ලෙස සීනි  මෙන් 200 ගුනයක් ප්‍රභල බව කියැවේ. එම නිසා ඉතා අඩු භාවිතයකින් කැලරි කිසිවක් ආහාරයට එක් නොකරමින් පැණි රස ගැන්විය හැකි ආදේශකයකි.

මේ ඇති ඉහත කී රසායනිකයන් ශරීරය තුලදී බිඳීමට ලක් වීමේන් ශක්තිය නිපදවන්නේ නැති වුවත් එම රසායනික ප්‍රථික්‍රියාවෙන් මෙතනෝල් අල්ප වශයෙන් නිපදවේ. මෙම මෙතනෝල් තව දුරටත් බිඳීමෙන් ෆොර්මැල්ඩිහයිඩ් (ෆොර්මලීන් ) නම් රසායනිකය සෑදෙන අතර එය හඳුනා ගත් කාර්සිනෝජනයක් හෙවත් පිළිකා කාරකයකි.

කෙසේ වෙතත් මේ ඇස්පාර්ටේම් රසකාරකය මීට බොහෝ කලකට පෙර ඇමරිකානු ආහාර හා ඖශධ පරිපාලනය (FDA) විසින් අනුමත කර ඇති අතර 2007 දී එය නැවත තහවුරු කොට ඇත. ඔවුනට අනුව
සිදු කර ඇති වැඩිදුර පරීක්ෂණ ඔස්සේ අස්පාර්ටේම් හා සිරුරේ වර්දක (ටියුමර්ස් ) හට ගනීම පිළිබඳ පැහැදිලි සබඳ තාවයක් හඳුනාගෙන නැති අතර ඒ නිසා මුලින් කර ඇති අනුමැතියෙහි වෙනසක් කිරීමට අනවශ්‍ය බව ඔවුන් ප්‍රකාශ කර ඇත.

එය එසේ වුවත් වෙනත් පරීක්ෂන් කණ්ඩායම් තම පරීක්ෂන ප්‍රථි පල ඔස්සේ පෙන්වා දෙන්නේ මීයන් ඇසුරින් සිදු කල පරීක්ෂන මගින් දිගින් දිගටම ඇපාර්ටේම් ලබා දුන් මීයන් බහුල වශයෙන් ටියුමර්ස් වර්ධනය වීමට බඳුන් වූ බවකි.

ඇස්පාර්ටේම් වෙත පක්ෂ පාතීව අදහස් දක්වන්නන් මෙහිදි පෙන්වා දෙන්නේ ඉතා ප්‍රභල පැණිරස කාරකයක් වන ඇස්පාර්ටේම් මිනිසුන් ආහාරයට ගත්තද දෛනික පරිභෝජනය වන්නේ ඉතාමත් සුළු ප්‍රමාණයක් පමණක් බැවින් එමගින් සෑදෙන මෙතනෝල් ප්‍රමානය මිනිස් සිරුරක බර සමග සැසඳීමේදී කිසි සේත්ම හානිකර තත්වයකට පත් නොවනා බවයි.

එසේම තවත් පර්යේශකයන් කියන්නේ මේය දිගින් දිගටම ශරීර ගත වීම නිසා එහි අහිතකර ප්‍රථිඵල කාලයත් සමග ඉතා දීර්ග කාලයකට පසු අත්දකීමට ලැබෙනු ඇති බවයි.

තව දුරටත් මා ඔබේ අවධානයට ලක් කරන්නට කැමති කරුනක් වේ.
ඇමරිකාවේ ආහාර හා ඖෂධ පරිපාලනය(FDA) හා යුරෝපයේ යුරෝපීය ආහාර සුරක්ෂිතතා අධිකාරිය(EFSA) විසින් අනුමත කර ඇති මේ රසකාරකය භාවිතා කර ඇති ආහාර දර්ව්‍ය ඇසුරුම් වල ළමයින්ට නුසුදුසුය කියා නිශ්පාදකයින් විසින් සඳහන් කිරීමට පෙළැඹී ඇත.
එනම් මෙය ඉතා දීර්ඝ කාලයක් භාවිතයෙන් අනිසි ප්‍රථිඵල ඇති කරවන බව ව්‍යංගයෙන් පිළිගනීමට ආහාර නිශ්පාදකයන් පවා එකඟවේ.

තව දුරටත් ඇස්පාර්ටේම් භාවිතයෙන්
හිස රුදා
කරකැවිල්ල හෝ ක්ලාන්ත ගතිය
ආහාර ජීරණ අපහසුතා
මානසිකතවය වෙනස් වීම්

හා වඩා බරපතල රෝග තත්ව වන
ඇල්සයිමර් රෝගය
උපත් සංකූලතා
පාර්කින්සන් රෝගය
අදී බරපතල තත්ව ගනනාවක් ඇති විය හැකි බව ඇමරිකානු පිළිකා අයතනය (Cancer.org) මගින් දක්වා ඇත.
එහෙත් මේවා පර්යේශන මගින් ඍජුවම සහිතක කොට නැති බවක් ඔවුන් සඳන් කලද ඒ ඔස්සේ ඇස්පාර්ටේම් අහින්සකයෙකු නොකිරීමට ඔවුන් වග බලා ගනී.

ඉතින් මෙවැනි තත්වයක් යටතේ නොබෝ දිනකින් ශ්‍රී ලාංකිකයන් නිරාවරණය වීමට නියමිත් අළුත් සගයා (Aspartame) මිතුරෙකුද නැතහොත් මිතුරු වෙසින් එන මාරයාගේ නියෝජිතයෙකුදැයි විමසීමෙන් බැලීම කාගේත් ශරීර සෞඛ්‍යයට හිතකර වනු ඇත.




Tuesday, July 3, 2018

ග්‍රාමීය ණය උගුලේ ජාතියම හිරවෙයිද?


ග්‍රාමීය ණය උගුලක් ගැණ කථිකාවතක් දැන් කාගෙත් ඇහැ ගැහිලා ඇති.
මෙය දැන් වසර කිහිපයක් පැරණි කථිකාවක් වුවත් තවමත් එය ඉතා උනුසුම් සිදු වීමක් ලෙස සමාජය වෙලා පැතිර යමින් තිබෙන සිදුවීමකි.

මොකක්ද මේ ග්‍රාමීය ණය උගුල.

දුප්පත් ග්‍රාමීය ජනතාවට විවිධ පෞද්ගලික ණය දෙන ආයතන, ලීසිං කොම්පැණි, හා ඇතැම් රාජ්ය නොවන සංවිධාන මගින් දැන් අරම්බ කර තියෙනවා සහන ණය යෝජනා ක්‍රම. මේ නය යෝජනා ක්‍රම වල මිනිසුන්ට ඉතාමත් ආකර්ෂනීය පහසුකම් සලසා තියෙනවා.
විශේශයෙන්ම ණයක් ගැනීමට ඇප කරුවන් හෝ ඇප සඳහා දේපල නැති දුප්පතුන්ට ඔවුන් කිසිදු ඇපයක් නැතිව ණය ලබා දෙනවා.
බැලූබැල්මට මේය ග්‍රාමීය ආර්ථිකය හා ගැමි ජනතාවගේ පරිභෝජන ශක්තිය වැඩි දියුනු කිරීමට හොඳ රුකුලක්.

එනමුත් මෙහි අභ්‍යන්තරයට පිවිසී බලන විට අපිට දකින්නට ලැබෙන්නේ වෙනත්ම කථාවක්. ඒ ගැන සමාජයේ සෑම තරාතිරමකම අවධානයට ලක් විය යුතු අති භයානක ගැටළුවක්.

මේ ගැටළුව නිර්මාණය වන්නේ ණය දීමේ ආරම්භයේ පටන්මයි.
ඔවුන් ඇප කරුවන් නැති ණය ලෙස හැඳින්වූවාට එක ණය කරුවෙකු සඳහා ව්‍යංගයෙන් ඇප කරුවන් දෙදෙනෙකු හෝ තිදෙනෙකු සම්බන්ධ කරනවා.
මේ ණය ක්‍රම වල ප්‍රධාන ඉලක්කය වී ඇත්තේ ගැහැණුන්. මතුපිට ඉලක්කය ග්‍රමීය වනිතාවන් සවිබල ගැන්වීම.

මේ සමාගම් වලින් යොදවා ඇති ණය දෙන නිලධාරීන් හෙවත් ඔවුන්ගේ සේල්ස් රෙප් වරුන් ණය ප්‍රවර්දනය සඳහා ගෙයින් ගෙට යන්නන්. ඔවුන් ණයක් ගැනීමට බලාපොරොත්තු වෙන අයෙකුගෙන් ඉල්ලන්නේ තමන් සමග ණය ගැනීමට තවත් දෙදෙනෙකු හෝ තිදෙනෙකු කැඳවා ගන්නා ලෙසයි.
මේ ක්‍රමය නිසා ඉතා පහසුවෙන් ලැබෙන ණය මුදල ගැනීමට නූගත් මිනිසුන් පහසුවෙන් පෙළැඹෙනවා. ඉන් පසු ඔවුන් සියළු ගිවිසුම් අත්සන් කර තිදෙනාගේ හෝ සිව් දෙනාගේ කණ්ඩායමටම එක් වර ණය මුදල නිකුත් කරනවා.
ඔවුන්  ණය වාරික නොවැරදිව ගෙවා යන තුරු ප්‍රශ්නයක් ඇති වන්නේ නැහැ. එහෙත්, යම් කිසි අර්බුධකාරී තත්වයක් නිසා එක අයෙකුගේ ගෙවීම කල නොහැකි වුනොත්, ඔවුන් එම ඩෙවීම අනෙක් සාමාජිකයින්ගෙනුත් අය කර ගැනීම ප්‍රතික්ශේප කරනවා. ඒ ඔස්සේ මුළු කණ්ඩායමම ප්‍රමාද ගාස්තු හා අමතර පොළී මුදලකට වග උත්තර කරුවන් බවට පත් වෙනවා.

එතැනින් ඇරඹෙන ගැටළුව, ක්‍රම ක්‍රමයෙන් ඉදිරියට යනවා. ප්‍රමාද වී ගෙවූ විට ගිණුම් වල සටහන් වන්නේ ගෙවූ මුදලින් අඩක් පමණයි. අනෙක් අඩ ප්‍රමාද ගාස්තු හා දඩ පොළී වෙනුවෙන් කැපී ගිහින්. මෙසේ දෙතුන්  වරක් වූ විට ඉන් පසු ගෙවා දමන මුදල හුදෙක් පොළී සහ දඩ වලට සීමා වෙන බැවින් මාස් පතා ගෙවූවද මූලික ණය මුදල ගෙවීම සිදු වන්නේ නැහැ.

මේ ආකාරයට ගැටළුවෙහි පැටලෙන ගැහැණුන් ඉන් පසු ණය දෙන්න ආ ආදරණීය නිලධාරී මහතාගේ පෞද්ගලික ගොදුරු බවටත් පත් වී ඇති බවට වාර්ථා පල වෙනවා.

මේ ආකාරයට දිගින් දිගටම ගමෙන් ගමට මිනිසුන් ණය නිසා ජීවිතය බිඳ වැටීමක ලක් වෙමින් සිටිනවා.
මේමට්ටමට පැටලුනායින් පසු ඔවුන්ගේ ණය වගකීම් නිතැතින්ම ඔවුන්ගේ වත්කම් හා ආදායන් සීම ඉක්මවා ගොසින්. ඉතින් ඔවුනට එහි කිසිදු ගැලවීමකට මගක් නැහැ. එක්කෝ ජීවිතය ඇති තුරා නොගත් නයක් ගෙවීමට වෙනවා, නැතහොත් ඉඩ කඩම් ඇතිනම් විකුනා පාරට බහින්නට වෙනවා.

මේ ආකාරයට මේ ණය යෝජනා ක්‍රම ග්‍රාමීය සමාජය සවිබල ගැන්වීමකට වඩා ග්‍රාමීය සමාජය බිඳ වට්ටන් බවට පත් වෙමින් තියෙනවා.

ණය ගෙවා ගත නොහැකි මිනිසුන් වෙත ණය සමාගම් නිලධාරීන් පොලීසිය භාවිතා කරමින් තර්ජන හා බිය වැද්දීම් කරනා බවටත් ඇතැම් තැන් වලින් වාර්ථා වී තියෙනවා. එහෙත් නීතිඥ මතය නම් මෙවැනි ගැටළුවක් කෙරෙහි මැදිහත් වීමේ නෛතික බලයක් පොලීසිය සතු නොවනා බවයි.

එහෙත් මේ දුප්පත් නූගත් ග්‍රාමීය ජනතාව පොලිසිය සතු නෛතික සීමාවන් නොව පුර වැසියකු ලෙස තමන් සතු නෛතික බලය හෝ අයිතිවාසි කම් ගැන වත් නොදැනුවත් අහින්සකයින් වීම මේ දඩයක් කරුවන්ගේ ගොදුර පහසු ඉලක්කයක් කර තිබෙනවා.

දන් දැන් පෙනී යන ආකාරයට මේ ව්‍යසනය ග්‍රාමීය කෘශි ආර්ථිකය මත මහත් බරක් වෙමින් පවතී. ඒ ඔස්සේ ග්‍රාමීය ජනතාව කෘශි ආර්ථිකයෙන් ඉඅවතට තල්ලු වීමේ අවධානමක්ද, සමස්ත ප්‍රජාව බිඳ වැටීමේ අවධානමක්ද මතු වෙමින් තිබේ

මෙහෙම් ගියොත් රටකට අනාගතයක් තියේවිද?
ව්‍යාපාර සිදු කිරීමේ සදාචාර සීමාවන් ගැන රටේ වගකීමක් නැතිද?

Wednesday, March 7, 2018

වඳ පෙති කොත්තු,


මෙහෙම කොත්තුවක් කන්න කාටවත් ඕනේ නැතුව ඇති ඇයි දෙයිය්යනේ කොත්තු කනවනම් මොන තරම් කොත්තු ජාති තියෙනවද
එලවලු බිත්තර, කුකුල් මස්, මාළු ඒ විතරයෑ දන් තියෙනවා ඌරු මස් එළු මස් ආදී මෙකී නොකී මස් වර්ග ඉස්සො දැල්ලො වගේ මුහුදු ආහාර ඊටත් වඩා ඩොල්පින් කොත්තුත් තියෙනවා ඔන්න

එතකොට වඳ පෙති කොත්තු කන්නේ වඳ වෙන්නද? නෑ නෑ ඕඩර් කරල වඳ පෙති කොත්තු කන්නේ නැහැ. සිංහල මිනිස්සු වඳ කරන්න මුස්ලිම් කඩ වලින් එහෙම එකක් දෙනවලු. 

ඒ අතරෙ වාදයක් යනව එහෙම බෙහෙතක් හොයා ගෙනත් නැහැ කියල තව සමහරු කියනවා අසවල් අසවල් බෙහෙත් ජාති වලින් එහෙම වඳ බාවය ඇති වෙනවයි කියලා.

ඇත්තටම වඳ පෙති දානවයි කියමු, ඔප්පු වෙලා නැති නිසා මේක තාම සැකයක් විතරනේ.
එහෙම සැකයක් ඇති වෙන්නේ ඇයි මූලිකම හේතුව ජාතින් අතර විශ්වාසය පළුදු වෙලා. ඒක ඉබේ වුනු දෙයක්ද? එහෙම වෙන්නත් බැහැ නේ. එක ජාතියක මිනිස්සු ඉන්න රටකට වෙනත් ජාතියක් ආ ගමන්ම බලන්නේ ඇකයෙන්නේ. ඒ සැකය දුරු වෙන්නේ ටික ටික කාලයත් එක්ක මිනිස්සු අතරේ වෙන නොයෙකුත් ගනුදෙනු එක්ක සැකය තිනී වෙලා තුනී වෙලා මැකිලා යනවා.
එතකොට අළුතින් සැකයක් උපදින්නේ. මෙක වෙන්නේ ඉතින් තනි අතින් අප්පුඩි ගහන්න බැහැ කිව්ව වගේ, සැකයට බාජනය වෙන උදවියගේ ම නොයෙකුත් මෝඩ අදූරදර්ශී වැඩ නිසාමනේ.

ඒ අතරේ අනෙක් පිරිසත් නොයෙකුත් හේතු නිසා මෙහෙම සැකයක් රෝපනය කරන්න බලාගෙන ඉන්නවා. ඒකට පෝර දාන දෙයක් සිදු වුනු ගමන් වැඩේ නැගල යනවා. ඔන්න ඉතින් ප්‍රචාරය යනකොට මුස්ලිම් කඩ වල කොත්තු වලට වඳ පෙති දානවා කියලා ඒක පිළිගන්න වගේම ප්‍රතික්ශේප කරන කොටසකුත් බිහි වෙනවා. ඒ වගේම එහෙම දෙයක් ඇහුනත් ඔළුවට යන්නෙත් නැති ගනනකට ගන්නෙත් නැති වගේ වගක් නැති බහුතරයක් තමයි ඉන්නේ.
ඉතින් ඔය වඳ පෙති දැමීමේ සාධාරන ඉඩක් තියෙනවාමයි කියමුකෝ. දැන් ඕක බල පාන්නේ කාටද? මුලින්ම ඕක ප්‍රශ්නයක් වෙන්නේ එහෙම දෙයක් ගැන සැකය උත්පන්න කල පිරිසට. ඉතින් ඔවුන් කල යුත්තේ එවැනි තැන් මග හැරීමනේ. මොකටද මුස්ලිම් කඩෙන් කොත්තු කන්න යන්නේ.

ඒ අතරේ නොදන්නා මිනිසුන්ට එවැනි වැරදි දෙයක් ආහාරයට දානවාමයි කියලා බරපතල විදියට හෙතු යුක්තව සැකයක් උපදිනවා නම් එයින් කෑම පාර්සල් තැන තැන ඇති කොත්තු කඩවලින් මිලදී ගත හැකියිනේ. අරගෙන වඳ පෙති කියලා සැක කරන රසායනික ඖශධ පිළිබඳව පරීක්ශන කල හැකියිනේ.
එහෙම තහවුරු වෙනවානම් අන්න වැඩේ හරි. එතනදී නීතිය සාධාරණව ඉටු වෙනවාද නැතිනම් පී එච් අයි මහත්තුරු හෝටල් වල කෑම තියෙද්දී ජරාව කනවාද කියලා බලා ගත්තහැකි වෙනවානේ.

ඒත් ඉතින් දැන් මේ මොකද වෙන්නේ.
වඳ පෙතී දැම්මයි කියල සැක කරන කඩේට ගිනි තියනවා. එහෙම කල බවට කෝ සාක්කි? 
විනාසයි නේද? 

කිසිදු සාක්කියක් නැහැ, ඒ මදිවට වඳ කොත්තු ගැන සැක උන්ම මුස්ලිම් කඩවලින් ගිහින් කොත්තු කනවා.
අනේ මන්දා මේවායේ තෙරුම මොකක්ද කියලා.

එක්කො සිංහලයෝ මෝඩයි. එහෙම නැත්නම් මේක වඳ පෙති කථාවක් හරහා ගෙනියන වෙනමම වැඩ පිළිවෙලක්. මට නම් හිතෙන්නේ ඔන්න ඔහොමයි.